Okahao - Ngele uusiku inawu vala ondjamba nena shiti ota ka tekela mbundje pombala yoshitunda shaaNekuni yaamulilo, sho oshituthi shomagongo tashi sholokele mondambo ehuliloshiwike ndika.

Omupopiliko gwokangundu hoka ke na oshinakugwanithwa shoku unganeka omagongo Alexander Anguwo pethimbo a li moonkundathana naKundana okwa li a gandja ekwashilipaleko kutya ayihe oya pwa okulongekidhwa na ngele omutse ogu li kumwe nothingo kehe ondjuhwa otayi ka tondoka nehandja.

“Ongongola omo yi li , otwa tegelela konyala aantu ye thike lwopo 3000 lwaampoka, moka twa hala kehe omuntu a kale a nwa 500ml dhomagongo lwaampoka,”Alex ta ti.

Oshituthi shomagongo otashi ka tameka nohungi ndjoka yi li ko nena notayi tameke potundi ontiyali yomutenya.
“Elalakano lyohungi olyo okundungika aantu kombinga yoonkulunkedhi dhoshitunda shaNgandjera,moka taku ka tangwa omazimo, ondjokonona yoshitunda,osho wo iituthithi ya simana mOnekuni ngaashi omapiitho nosho tu,” Alex ta tsikile.
Okwa ti kongulohi oku na wo oshipopiwa shoUNESCO ndjoka yi li ya tula oshituthi shika koshiyalo, naantu otaya ka mwenyekwa nduno nomanyando ga yooloka ngaashi ombwiku, okambulumbumbwa, aahikingalo ya yooloka ngaashi D-Naff naTate Buti otaya ka nukila mondambo okupa mo aantu miiyimbo yawo yo taya wayiminwa nduno kuNumber One Bigger.

“Ngula mOlyomakaya omiyelo otadhi ka patuluka potundi ontihamano yongula moka twa tegelela aantu ya tameke okweenda, nopolohalama otayi ka tameka potundi ontimugoyi yongula onkene oshigwana otashi indilwa opo shi kwate ondjuhwa komulungu,”Alex ta ti.

Okwa ti egameno oli li pombanda onkene kapu na nando ogumwe a pitikwa okweenda noshilwitho onkene iilwitho nayi thigwe komagumbo.

“Onkene tatekulu Johannes Mupiya mwene gwiita ota hiya aantu ayehe koombinga ne dhevi opo ye ye ya new ongongola koshitunda she yo yandungikwe nokutyapula pmawe iikwankulunkedhi yoshigwana shaNgandjera,” Alex ta ti nohamu.