Ongeleka yOmuprofeti Jackson ‘Babi’ Mbabi oya kumagiidha aalanduli ye oshowo nosho wo iilyo yongeleka ye, opo ya “yande oku pulakena ohapu tadhi sheke Omuprofeti, komalungula, sigo a mangululwa nenge a monika ondjo kohofa”.

Babi oye mwene gwongeleka tayi ithanwa House of Joy Ministries. Babi naya kwawo mboka ya kwatwa nayo oya holoka lwotango mompangulilo mEtitano lyazi ko, ashike oya tindilwa ya ifutile mo. Mbaka otaya pangulilwa oku kala niilyo yiinamwenyo ya gamenwa. 
Momushangwa ngoka gwa pitithwa komalungula kongeleka ye, ogwa koleke kutya Babi okwa mangwa po kopolisi Etitatu lyomomasiku 27 gaMei nuumvo, sho anuwa a dhika nomayego gaali goompanda. Okwa kwatwa po pamwe nomupolisi oshowo omukwiita gwetaga lyegameno lyaNamibia. Mbaka oya adhikwa wo nondjembo, niinima mbyoka anuwa oya adhika megumbo lye. 

Ongeleka ndyoka oya popi kutya pethimbo oshipotha shoka tashi konaakonwa no shili momake gopolisi, ongeleka otayi kala pamwe naBabi momagalikano noya itaala muuyuki gwe.
 Shoka oye shi popi aniwa sha ikwatelela kekotampango lyoshilongo ndjoka tali ti kutya kehe gumwe omuyuuki omanga inaa monika ondjo kohofa.