Komufala wopolifi moshitukulwa shaMusati Commissioner Ismael Basson ota ti ita ka fiya emanya la londa kuli kwao kombinga yovanhu tava longo oimbuluma moshitukulwa.
Okwa ti ota lalakanene opo oimbuluma i kale ya shuna pedu mOmusati unene tuu omakwatonghonga, okudipayafana noshoyo oumbudi woimuna.
Basson okwa kunghilila oshiwana opo shi kale tashi longele kumwe nopolifi mokulwifa oimbuluma noshoyo okukala tashi yandje ouyelele kopolifi ngeenge tai konga ovafekelwa.
Meenghunafana a ninga naKundana Etivali okwa ti ombelewa yaye otai lalakanene okuyandja omayakulo elixwapo kovakwashiwana va pumbwa omayakulo opolifi noshoyo okukwashipaleka kutya oshiwana oshi li meameno.
“Ohandi ka kala nokuninga oikonga momikunda kombinga yomahepeko omomaumbo nokuyandje ehongo kovakainhu vaha kupeleshi va li ounona vavo,” Basson ta ti. Okwa pula ovaleli vopamufyuululwakalo opo va kale tava longele kumwe nopolifi mokukondjifa oimbuluma komikunda.
Okwa ti osha fimana opo oveleli navo va kale ta kufa ombinga mokulwifa oimbuluma komikunda tashi pitile mokulopotela opolifi kombinga oimbuluma tai li nyenge komidingonoko davo.
Okwa weda po ta ti ombelewa yaye otai ka telela po omalelo opamufyuululwakalo opo va ku ndafane nghee ve na okulongela kumwe mokukondjifa oimbuluma.
Onghee okwa ti elalakano okukale ka po ekwatafano liwa nombili pokati kopolifi nomalelo opamufyuululwakalo.
Okwa yelifa ta ti omunhu keshe okwa manguluka okukala a talela po ombelewa yaye opo e uye okupopya oupyakadi waye ile ngeenge e na e wedale po lomayele kombinga nghee oimbuluma i na okulwifwa.
“Ouyelele nehongo owa pumbiwa moshiwana unene tuu kovanhu hava di komikunda nghee opolifi hai longo.
Oshiwana osha pumbwa okukala shina e kwatafano liwa nopolifi opo shi dule okukala tashi yandje ouyelele kombinga yoimbuluma,” Basson ta ti.
Okwa kunghilila oshiwana opo shi kale alushe shina eenomola dopolifi efimbo keshe opo shi lopotele opolifi oimbuluma ile ngeenge sha pumbwa omayakulo opolifi.
“Oimbuluma otai lwifwa noupu ngeenge oshiwana tashi longe kumwe nopolifi, onghee osha fimana ngeenge oimbuluma tai lopotwa pefimbo opo opolifi i kale ya ninga omakonakono noupu,” ta ti.