WINDHOEK - Osipana yopashigwana yaNamibia oya dhana shi thike pamwe naComoros molweetho olutiyali lwoChan pokapale koSam Nujoma ohela. Iizemo mbika oya hala okutya Namibia ota yi kedhingoloko etiyali nokwa tegelela ngoka ta ka sindana pokati kaMadagascar naMozambique mboka taya ka dhana momasiku 20 Sepetemba 2019.
Namibia okwa li a tula Comoros koongodhi nokwa li a thangele mokoola iikando omugoyi. Okuza petameko Brave Warriors oya li tayi ulike uudhano uuwanawa noku eta omatanga mokakelenga, shoka sha li tashi longitha Comoros nuudhigu.
Comoros ngoka a li ta monika a fa a umbila mo oshifanduke okuza petameko okwa li koongodhi, nokwa li ta longo nuudhigu, omudhani gwoMighty Gunners Elmo Kambindu okwa li a palutha okoola medhingoloko lyotango nonando a li a mono ompito ya eguluka ngaaka.
Marcell Papama, ngoka a li u ulike uudhano uuwanawa, okwa li a mono oompito mbali komeho gokoola ashike moompito adhihe okwa thangele etanga mombanda. Omudhani ngoka a mana nookoola odhindji moliga yaNamibia Issakar Gurirab okwa li a etwa mo muudhano medhingoloko etiyali, e ya mo naRudath Wendell ashike inashi pondola sha ngele tashi ya kokutula mo okoola.
Larry Horaeb okwa li a hatwa po mokakelenga ashike inapu gandjwa opelenti.
Absalom Iimbondi naye okwa li wo a mono oompito mbali sho a li a thengele mo okuza kokule ashike omatanga oga li ga keelelwa.
Omudheuli gwopakathimbo gwoBrave Warriors Bobby Samaria okwa ti oshiwanawa sho inaya tulwa okoola noya dhana nawa,nonando oya li nomupya sho inaya tula mo okoola. “Otwa mona oompito ashike inatu pondola okutula mo okoola, out na okutula mo ookoola uuna twi iyadha tu na oompito ngadhoka.” Ta ti ngaaka.
Samaria ta ti oya tegelela kokamitiye kelandulathano ka tulwa po kuFifa kutya ota yi komeho ngiini muudhano wonkambadhala yokuya kekopi lyuuyuni. “Ngashingeyi oku na uudhano wokuya kekopi lyuuyuni naEritrea. Onkene otwa tegelela oku uva ngele iilonga yetu oya kwatela mo okuya kekopi lyuuyuni,” ta gweha ko ngaaka.
Comoros ta ti oye wete oya li inaya ilongekidha nawa, sho ya eta osipana ndjika inaayi igililatahana nawa natango. Omudheuli Alef Francois ta ti oshikando oshititatu aadhani mbaka taya dhana pamwe, ta ti oye na natango oshindji okwiilonga