WINDHOEK – Namibia okwa tulwa mongundu ya-D methigathano lyekopi lyiigwana yaAfrica lyokatanga kokoompadhi, e li mongundu yimwe nomapenda muudhano mbuka, Morocco, Ivory Coast osho wo South Afrca. Aantu oyendji oyu ulike uumbanda wawo ngele Namibia ote ke shi pondola tuu sho ta ka taalela aasindani nale yekopi ndika omimvo dha yi, Ivory Coast naSouth Africa osho wo Morocco ngoka a li a kutha ombinga mekopi lyuuyuni mo2018 ndyoka lya li koRusia.

Ashike ondjokonona otayi ulike kutya oBrave Warriors oyi na okulwa ya tula ombunda moshihwa ngele oya hala oku ka sindana ekopi ndika . Mo1998, Namibia okwa li a tulwa mongundu ya-C, methigathano olyo tuu ndika, a li mongundu yimwe naIvory Coast, South Africa naAngola noya li ya dhengwa kuIvory Coast muudhano wotango nookoola 4-3.

Ricardo Mannetti, ngoka oye ta dheula osipana yoBrave Warriors ngashingeyi okwa li a tula mo okoola yimwe. Namibia okwa li a dhana shi thike pamwe naAngola ye ta hanagulwa po kuSouth Africa 4-1 muudhano wahugunina. 
Oomvula omulongo okuza mpoka, aamati yaNamibia oya li natango ye shi pondola okuya koGhana mo2008. Namibia okwa li mongundu yimwe naMorocco, Ghana naGuinea. Brave Warriors oya li ya dhengwa 5-1 kuMorocco.