Omupeduminista mouminsteli wehongo Faustina Caley okwa kunghilila ovakulunhufikola opo va xulife po okukala tava anye okutambula ounona mondodo yotete shaashi vehe na eedjapo domadalo.
Okwa ti kape na oveta tai ti kutya okaana ngeenge kehe na ondjapo yedalo itaka tambulwa mofikola.
Onghee okwa ti okaana keshe Okanamibia ke na eedula da fika okuya mofikola oke na oufemba wokukala ka tameka ofikola mondodo yotete.
Okwa didilikwa ovadali vahapu konooli hava kala tava nyenyeta efimbo keshe eshi vati ovakulunhufikola hava anya okutambula ounona vavo va tameke ofikola.
Ovadali vamwe fiyo onena ove na ounona vavo ve li momaumbo shaashi vati vaha nyenwa okutambulwa mofikola onghee eshi paife osha heta oupyakadi pokati kovakulunhufikola novadali.
Unene tuu oshitukulwa shaHangwena osho shimwe sha didilikwa shi na ovadali alushe hava kala tava ti ovanakulunhufikola itava longo pauyuuki eshi ihava tambula ounona vavo.
Caley okwa lombwela Kundana Etivali ta ti kape na omuhongifikola ile omukulunhufikola e na oufemba woku anya okutambula okaana mofikola.
“Ava tava ningi oshinima eshi otava i kondje yekotamango shaashi ekotamango loshilongo otali ti ounona aveshe nava ye koifkola,” Caley ta ti.
Okwa kunghilila ovadali opo va kale tava lopotele eembelewa dehongo moitukulwa yavo ile va dengele keembelewa dehongo da kula dili koWindhoek opo keshe omukulunhufikola ta anye okutambula ounona a kale a ka tukilwa onghatu.
Okwa weda po ta ti ehongo ola fimana kokaaa keshe okaNamibia shaashi ounona ove tava ka ninga avaleli vokomongula. “Ovakulunhufikola nava kale ve na ekwatafano liwa novadali shaashi eshi otashi eta opo ovadali navo va kale topolafana omayelele avo kombinga yexumokomesho lofkola,” Caley ta weda po.