Loide Jason

WINDHOEK- Oombonge dhaakalelipo yaChina moshilongo odha indile opo Aanamibia ya longele kumwe nayo mokukondjitha ombuto ndjoka tayi taandelele moshilongo shawo ndjoka aniwa tayi hokololwa ya ziilila moshinamwenyo shomokuti.
Omukalelipo gwaChina Zhang Yiming okwa hokolola kutya oku shishi nawa kutya oshigwana shaNamibia oshi li momalimbililo unene ngele tashi ya komukithi ngoka omupeepeka gwa dhimbululwa moshilongo shaChina  iiwike iiyali ya pita nogwa dhipaga nale aantu yevulithe 138 muule womasiku omashona.
“Shoka tatu pula ngashiingeyi omayambidhidho guukumwe noshowo gwopamaliko ngaashi iilongitho mbyoka ya pumbiwa mokukwathela mboka ya ninga oshihakanwa shomukithi nguka,” osho omukalelipo gwaChina a hokolola ngaaka komeho gengathithi lyaatoolinkundana mboka ya li ya yi koshigongikundaneki shoka sha li koombonge dhaChina mEtine ongula moshilandopangelo.
Okwa ti ngashiingeyi omakwatathano gomalweendo pokati kaChina naNamibia oga kalekwa manga okuza momasiku sho ga li 27 gaJanuali omolwokukeelela omukithi ngoka gwa taandele kiilongo yilwe yaAfrica. Menenevi lyaAfrica omwa lopotwa nale omukithi ngoka moAngola noshowo moIvory coast.
“Otwa li twa ya moonkundathana nominista yuundjolowele nuukalinawa yaNamibia ashike otwa tsa kumwe nawa kutya Namibia oku li a ilongekidha nawa okukeelela omukithi ngoka, na kape na nande ompito omukithi ngoka tagu etwa mo kaakwashigwana yaChina moshilongo,” osho a hokolola ngaaka.
Okwa li woo a popi kutya miitopolwa mbyoka ya kwatwa komukithi ngoka omu na Aanamibia yeli 35 noye li megameno oshoka oya lombwelwa ya kale meni lyoondunda dhawo uule womasiku 14 omanga omukithi ngoka noshowo onkalo tayi hwepopala.
MoChina ayihe koonono omu na Aanamibia ye li 500 mboka ye li ko taya ilongo momayithano ga yooloka, ashike okwa dhenge omuthindo kutya China ota longo nuudhiginini okusa oshipwiyu kutya aantu mboka itaya kwatwa komukithi ngoka.
Ngashingeyi omayendathano moChina oga kalekwa mpanga agehe koonono unene komahala ngoka ga dhengwa koshikumungu shoka shomukithi shoka tashi taandele tashi endelele noonkondo sho otashi dhipaga aantu noonkondo.
Omukithi ngoka ogwa tseyika nedhina Coronavirus nogwa li gwa monika tango tango mokati kaDesemba ngoka gwa yi ashike ogwa tameke okutaandela unene muJanuali nuumvo.
Yiming okwa hokolola kutya Aanamibia mboka ye li taya ilongo moChina ihe oye ya kefudho moshilongo naya kale mo mpanga oshoka oosikola moshilongo shoka odha tulwa manga mefudho onkene oshi li mondjila okukala mpaka sigo onkalo tayi hwepopala.