New Era Newspaper

MTC Shares 2
Icon Collap
...
Home / Chrispin omwiitulimo nomunankondo …Inambao a tumbalekwa  koyendji

Chrispin omwiitulimo nomunankondo …Inambao a tumbalekwa  koyendji

2020-12-04  Edgar Brandt

Chrispin omwiitulimo nomunankondo …Inambao a tumbalekwa  koyendji
Top of a Page

Aakwanezimo, aniilonga opamwe naaleshi yoshikunandeki shoNew Era ohela oya li monkalo yoluhodhi lwonkundana ombwiinayi yeso lyomunyanyangidhi gwoonkundana dhoshifo shoka, Chrispin Inambao, ngoka a li a sile moshipangelo moWindhoek konima yuuwehame wethimbo ele. Inambao, 50, okwa li a hokololwa nokutumbalekwa kookuume ke onga omuniilonga ha longo nuudhiginini nokwa li e hole iilonga ye yuutoolinkundana osho wo yuunyanyangidhi. Omunyanyangidhi nguka a tseyika nawa okwa thigi ko aanona ye yane, aamati yatatu nomukadhona gumwe.

“Otwa kanitha omuniilonga omunashili nomunankondo gwoNew Era Publication Corporation. Chrispin okwa longela New Era uule woomvula 16. Okwa kala nokuya kiilonga nonando a kala kee iyuvite ethimbo nuule. Omathimbo gamwe, onga aaniilonga pamwe naye otwa kala momalimbililo kutya ohe shi pondola ngiini miilonga ye. Ashike Chris okwa kala owala noku tu lombwela kutya okwa kutwa kehangano ndika nosha li oshinakugwanithwa she okulonga nuudhiginini. Omagalikano ge nomadhilaadhilo getu oge li nofamili ye pethimbo ndika edhigu. Omwenyo gwe nagu vululukwe mombili,” osho omukuluntuwiliki gwo-NEPC Christof Maletsky a ti ngaaka. 

Omunyanyangidhi omukuluntu gwoNew Era omukulu, ngoka e li omunyanyangidhi ngashiingeyi koshifokundaneki shoNamibia Sun Toivo Ndjebela naye wo okwa li a popi ta ti: “Chris okwa li gumwe gwomaalongi nuudhiginini nonda hokwa okukala nda longa pamwe naye. Shoka hashi mu tongolola muyakwawo uukwatya we wokulonga neyitulemo.”
Omunyanyangidhi omukulu gwo New Era, Raja Munamava okwa gwedha ko:
“Chris okwa li omutoolinkundana a za onta, omukalo gwe gwokushanga ogwa li omuhokithi ye Oshiingilisa okambi mehuli. Okwa li e hole iilonga ye nokwa kwathela ehumokomeho lyoNew Era.”

Omukuluntuwiliki omukulu gwo-NEPC gwoomvula heyali, Sylvester Black, okwa li a ti Inambao okwa li omulumentu guukwatya kawu ndonyoka ngele tashi ya keyitaalo lye osho wo kombinga yuutoolinkundana woshili. “Chrispin okwa kala aluhe omukongi gwoshili. Ota kala aluhe oshiholelwa oshiwanawa kombinga yuutoolinkundana uuwanawa. Okwa li ha longo nuudhiginini naNamibia okwa kanitha omutoolinkundana omuwanawa,” Black ta ti ngaaka. 
Max Hamata, ngoka a longa pamwe naInambao koThe Namibian, okwa ti eso lye ekanitho enene nokwa ti oye kwa li gumwe gwomaatoolinkundana inaaya longithwa pamuthika mpoka pu thike ontseyo ye. “Chrispin okwa li omushangi omunongo nokwa kala ha gandja omahokololo taga ulike uunkulungu, nuuna to lesha ehokololo lye oho kala nomayiuvo wa fa ashike nangoye opo wa li poshiningwanima,” Hamata ta ti ngaaka.

Molwendo lwe, Inambao okwa li a ulike kutya oye gumwe gwomaanyanyangidhi dhingi muutoolinkundana waNamibia nokwa kwathela wo aashangi oyendji aagundjuka. Okwa longela omahangano goThe Namibian Workers, oshikundaneki shaaniilonga, omanga inaa ya koNamibia Press Agency (NAMPA), okwa zi ko a yi koThe Namibian onga omutoolinkundana omukuluntu nolwanima okwa yi koNew Era onga omunyanyangidhi mo2003. Uukwatya wainambao wokulonga nudhiginini nonohokwe otawu ka yuulukiwa kwaayehe mehangano lyo-NEPC.


2020-12-04  Edgar Brandt

Tags: Khomas
Share on social media
Bottom of a page