New Era Newspaper

New Era Epaper
Icon Collap
...
Home / Coronavirus ye ya…Epangelo la tula po eemiliona N$36 dekondjifo lombuto

Coronavirus ye ya…Epangelo la tula po eemiliona N$36 dekondjifo lombuto

2020-03-16  Staff Reporter

Coronavirus ye ya…Epangelo la tula po eemiliona N$36 dekondjifo lombuto
Top of a Page

Etyapulomanguluko la kalekwa
Eefikola da pata
Omalweendo a kalekwa 
Omutoolinghundana 

ONGWEDIVA–Sha landula eshi kwa monika ovanhu vavali moshilongo ve na ombuto yoCOVID19, omupresidente Hage Geingob okwa kaleka etyapulo loshivilo shemanguluko, osho kwali shi na oku endela pamwe neaneno laye moilonga. 

Okupendukila Olomakaya, Namibia okwa ninga oshilongo oshi ti 133 momunyuni oku mona omunhu e na ombuto yo COVID19, tai ifanwa yoo Coronavirus.

Omunambelewa omukulunhu moshikondo shoundjolowele Kalumbi Shangula, ongula yOlomakaya okwa shivifa kutya Namibia okwa yakula onghundana kutya omakonaakono oo kwali a tumwa koSouth Africa oku konaakona ovalihomboli vavali Ovaspain tava talele po moNamibia okwa ulika kutya ove na ombuto oyo. Ava ove ye moshilongo va pitila pokapele keedila kaHosea Kutako mEtitatu.
Geingob okwa ti oshivilo shemanguluko osha kalekwa, omupresidente ota anifilwa meumbo lepangelo, noshimaliwa osho kwali ngeno shi na oku longifwa metyapulo olo, otashi ka longifwa po oku kondjifa etandavelo loCOVID19.

“Epangelo laNamibia otali kaleke yoo omalweendo okudja ile oku ya koQatar, Ethiopia naGermany meemhadi di talala, oule womafiku 30 
komesho. Oyoongalele ile omangudumano ovanhu meengudu dinene nao okwa kalekwa oule womafiku 30,” Geingob ta ti. 

Omangudumano aa okwa kwatela mo  eefikola adishe dopaumwene nodepangelo. Hano eefikola otadi ka pata oule woivike ivali fiyo itatu komesho.
Omupresidente okwa kaleka yoo omalweendo ovanambelewa vepangelo, novomahangano opapangelo oku dja moshilongo. 

Pokati opo, odocumente ya monika kuKundana otai ulike epangelo laNamibia la tula oshimaliwa shifike poN$35 700 000, mekondjifo loCOVID19. 
Oku ya pomafiku 11 Maalitsa mounyuni omwa li mwa monika ovanhu veli 118 322, omo ovanhu veli 80 955 va nonika moChina, nomafyo eli 3162, omomafyo 4292 a lopotwa mounyuni, oo moChina. 
Mongaha ekonaakono lombuto oha li tetekelwa noku tala koupyu womunhu, nohaku shikulwa omakonaakono ma kwao a kwatela mo oku likalekela omunhu ta fekelwa e na ombuto oyo, oule womafiku 14. 

Oupyu wa pitilila 
Omukolo Okufuda noudjuu, nouyehame monhulo  Okututa omutwe
Oto li amene novaneumbo loye ngahelipi koCOVID19? Li tuvika kokanya nokomayulu ngeenge to kolola 
Djala okamaska komayulu nokokanya 
Wapaleka eenyala doye efimbo nefimbo nefimbo mefiku 
Wapaleka oitaafula, okulo yomivelo, oundjuo, eengodi, eeplaka dolusheno nosho tuu
Ino kala wa ehena unene movanhu

Yanda omangudumano 
Ngeenge ove, omunailonga pamwe naave ile omuneumbo oku na omadidiliko a yuka kwaao oCOVID19, omunaudu na kale meumbo, ndele to dengele ko 0800 100 100
 


2020-03-16  Staff Reporter

Tags: Oshana
Share on social media
Bottom of a page