New Era Newspaper

New Era Epaper
Icon Collap
...
Home / Covid-19: Elcin otaka ninga omailikano moshilongo ashishe

Covid-19: Elcin otaka ninga omailikano moshilongo ashishe

2021-07-08  Festus Hamalwa

Covid-19: Elcin otaka ninga omailikano moshilongo ashishe
Top of a Page

Ongerki yoEvangelical Lutheran Church moNamibia (Elcin) otai ka ninga omailikano e li kombinga yombuto yoCovid-19, omo mwa teelelwa ovafitaongalo pamwe navakwaneongalo aveshe vaElcin opo va ninge omailikano oo taa ka kala ko momafku 12 fiyo 16 Juli.

Meenghundafana a ninga naKundana omuwilikibiisofi Dr Shekutaamba V V Nambala okwa hokolola kombinga yomukanda ou a pitifa, e u shangela oilyongerki yaElcin, ta tu oshiwana omukumo opo shi kale sha ninga omailikano opo ombuto yoCovid-19 i xule po. 

Onghee okwa ti oilyo aishe yaElcin tava ka ninga omahalikano owina opo ovanhu va kale veli nyongamena vo vashiive oku indilila ombuto ei.

“Efiku nefiku omwaalu wovanhu tava fi koCovid-19 otau londo wa yuka pombada, oipangelo oiyadi unene ovanhu va kwatwa kombuto ei. Ounona vahapu ova ninga eefiye shaashi ovakulunhu vavo ova fya kombuto ei, neliko loshilongo ola shuna pedu mopaife. Onghee hano onga ovaitaveli, otu na okuya keengolo ndele hatu indile twe litula mo opo tu lwife omukifi u li moshilongo shetu,” Nambala ta ti.

Ta weda po ta ti ovanhu ashike ve li 10 va pitikwa okukala meni longeleka pomafiku oo a tulwa po omailikano, yee ta ti ovanhu vamwe nava ninge omailikano momaumbo avo shaashi omangudumano aa okwa indikwa.

“Onghee hano oshivike shomafiku 12 fiyo 16 Juli otashi ka kala oshivike shomailikano omo ovanhu aveshe va teelelika opo va kale ve li momaumbo avo tava indile. Kaku na shimwe Kalunga ita dulu, kalunga oku na eenghono onghee otwa pumbwa okulongifa omhito oyo ndele hatu ningi omailikano omoule,” Nambala ta ti.

Omubiisofi okwa twa omaongalo opo akale e na omukumo neitavelo la pama pefimbo eli lidjuu longhalo yoCovid-19 ye va denga pomutima.

Okwa denga omufindo ta ti ovakwangeleka na va kale ve na eenghono pefimbo eli tava kanifa ovakwapata vavo molwomukifi ou. Onghee okwa ti oshiwana nashi kale shi na omukumo, neenghono nombili pefimbo eli lovanhu tava fi kombuto ei.

Pexulilo omuwilikibiisofi Nambala okwa indila opo oshiwana shi kale meitavelo nomeameno lexupifo laKalunga.

Natu liufeni komilandu doCovid-19 edi da tulwa po shaashi omufiki ou owa nyika oshiponga neenghono,” omubiishofi ta ti.


2021-07-08  Festus Hamalwa

Share on social media
Bottom of a page