Elelo lyondoolopa yaShakati olyi li metifa, okukundathana nokutokola ngele aalandithi yomomapandaanda naya tameke okulanditha nenge natango naya kale momagumbo. 

Omugandji gwomawuyelele mombelewa yelelo lyondoolopa Katarina Kamari okwa ti, natango inaya pititha uyelele ngele aalandithi yomomapandaanda naya tameke okulanditha. Aanambelewa aakuluntu opo manga taya kundathana, no tashi kapitithwa momasiku omafupi ta geya.

Mboka ya pewa uuthemba okulanditha esiku oshilongo sha patuluka, omboka yeli momatala omanene gaShakati, oshoka oyeli kohi yetonatelo ethimbo alihe okutala ngele otaya gwanitha po nokusimaneka omilandu dha tulwa po, okukeelela omukithi gwoCovid-19,” Kamari ta ti ngaaka. Kamari okwali a kumagidha aalandithi yomopandanda ya idhidhimike, sigo taya yelithilwa kutya uunake taya ka tameka uuna, ayihe ya manwa okukundathwanwa moshiwike muka.

Gumwe gwomaalandithi yokapana mOshakati ngoka inaa tumbula edhina okwa ti, ita vulu okukala eli megumbo itaa landitha, oshoka mokapana omo ha mono iyemo ye, yokumuhupitha.

“Oshilongo shika otashi tumonotha ihuna, tse otse tatu kondjo ihe natango otse ashike ta tu shunithwa pevi, otatu kalya peni ano. N$750 ndjoka ya gandjwa mpoka ina tuyi mona natango, nonando ka kwali ya gwana,” omushingithi gwokapana ta nyenyeta. Ta gwedha po ta ti, epangelo nali ninge po omalunduluko mpoka, nali kale tali tala aashingithi yuupana. Ta ti yokaye na mpoka haya hupile, ngele inaya landitha, shampa ta yeya fuka okulanditha, nena otaye ya sitha ondjala.

Omushingithi gwokapana okwa ti natango, yo kaye na uupyakadhi washa. Oye na ewuveko lyomukithi gwoCorona lyagwana, onkeene oye na oku ihumbata nokulandula omilandu adhihe dha tulwa po oshoka nayo oya hala oku ikeelela komukithi ngoka.