New Era Newspaper

New Era Epaper
Icon Collap
...
Home / CoW otaka tunga omaumbo

CoW otaka tunga omaumbo

2021-09-09  Festus Hamalwa

CoW otaka tunga omaumbo

Muni moshilando shaWindhoek ota ka tungila ovanhu 7000 omaumbo keenhele domalukanda a yooloka moshilando pangelo. 

Elalakano lokutunga omaumbo oku yandja omayakulo koshiwana nokukwashilipaleka kutya omalukanda omoWindhoek okwa mona omaumbo eli pashinanena.

Meenghundafana a ninga naKundana omupopiliko woshilando shaWindhhoek Harold Akwenye okwa popya ta ti, elelo la muni waWindhoek ola faneka opo likale la yandja edu lina eehofa 7000 lo kutunga omaumbo.

Akwenye okwa ti elelo laWindhoek olina oshisho noshiwana, onghee otali lalakanene opo ovakalimo vo momalukanda va kale va pewa omayakulo ngaashi omeva, oundjuwo, olusheno, nedu lokutunga omalukalwa avo.

Okwa ti elelo la muni waWindhoek ola ninga omutumba opo likundafane nghee omalukanda moshilando pangelo ena okukala a pewa omayakulo, nokukandula po omukundu woupyakadi wedu ou uli tau dana onghandangala moshilando pangelo.

“Elelo loshilando shaWindhoek ola longekida eemiliyona N$22 opo shi kale sha longifwa okutunga omaumbo pokakati ko 2020 -2021. Onghee otwa hala omaumbo aa ta ka tungwa opo ikale ena ondado tai dulika kovanhu,” Akwenye ta ti.

Okwa yelifa ta ti elelo laWindhoek otali ka tameka tete okutunga omaumbo kolukanda laGoreangab, nokonima otava ka tunga vali omaumbo koCimbebasia ta ku katungwa omaumbo eli 900.

Okwa elelo otali ka tunga omaumbo ena eenduda mbali nenge nhatu dokunangala.

Akwenye okwa kunghulila oshiwana opo shikaleke po oukoshoki moshilandopangelo shaashi osha fimana ngeenge moshilongo muna oshilando sha yela.

Okwa weda po ta ti ovanhu na va kale vatonatela omindilo nokukeelela okukala tava xwike omapeya shaashi osha nyika oshiponga, sho otashi kakeke omudingonoko.

Pefimbo elelo laWindhoek la ninga omutumba Etivali mayola woshilando Job Amupanda okwa popya kutya muni okwa yakula omadina ovanhu vahapu va ninga omaindilo edu, onghee hano okwa kunghulila oshiwana ta ti na shi kale shangungumana shaashi elelo loshilando shaWindheok ole lipyakidila nghee oshikumungu shedu shina okukala sha kadulwa po. – fhamalwa@nepc.com.na


2021-09-09  Festus Hamalwa

Share on social media