New Era Newspaper

New Era Epaper
Icon Collap
...
Home / E limangeleka eshi vati va tanguna nomukainhu waye

E limangeleka eshi vati va tanguna nomukainhu waye

2022-10-05  Festus Hamalwa

E limangeleka eshi vati va tanguna nomukainhu waye

Festus Hamalwa

Omulumenhu weedula 28 okwa fya eshi vati e likufa omwenyo konima kwa li tava tanguna nomukainhu waye meumbo lavo. Oshiningwanima eshi osha ningilwa molukanda Mondesa moSwakopmund efimbo longula lwopotundi 09h00 Omaandaxa.

Nakufya okwa tongololwa oye Lucas Festus omunailonga momina.  Omupopiliko wopolifi moshikutulwa Erongo Inspector Ileni Shapumba okwa hokolola ta ti vati konima eshi omukainhu va tanguna naFestus okwa dja mo monduda yavo yokunangala ndele tai a ka nangale mosheti.

Vati konima yefimbo omukainhu okwa penduka ndele ta i monduda nokuhanga omulumenhu waye e li meemhango a fya nale. Omukainhu vati okwa shivifila ovashiinda noshoyo opolifi kombinga yoshikumungu eshi.

Ovakwapata vaye ova shivifilwa kombinga yefyo laye nomakonakono opolifi otaa twikile. Kapena omunhu a kwatwa po mekwatafano lefyo laye.

Opolifi oya kunghilila ovaholafani opo va kale tava ka konga omakwafo kovaxungimwenyo ile kovafitaongalo ngeenge ve li hanga ve na omaupyakadi momakwatafano opaihole avo shaashi oku li kufa omwenyo ka kushi ekandule po lomukundu.

Eshi a kwatafana naKundana, omuxungimwenyo moshipangelo shaShakati Tuwilika Kalunduka ota ti ova didilika ovanyasha vahapu vehe hole okukakonga omakwafo kovaxungimwenyo ngeenge ve na moupyakadi momakwatafano avo opaihole.

Okwa ti unene tuu ovalumenhu ovo vamwe ihava holoka koipangelo ngeenge ve na oupyakadi ile tava vele eshi hava kala ashike va mwena komaumbo.

Onghee okwa ti osha fimana opo ovanyasha va kale tava ka konga omakwafo kovangimwenyo ile kovafitaongalo shaashi eshi otashi va kelele okukala tave li kufa eemwenyo

Okwa yelifa ta ti elalakano lovaxungimwenyo okuyandja omayakulo exungomwenyo kovanhu aveshe veedula da yooloka ve na omaupyakadi.

“Otwa kwafela ovanhu vahapu kwa li ve na omaupyakadi eshi hava kala a lushe va hala oku li kufa eemwenyo noshoyo ovakainhu hava kala va hala okulongela omaludalo avo ominyonena. Onghee oshiwana osha pumbwa okukala she li nekelela ovaxungimwenyo omaupyakadi avo shaashi ovaxungimwenyo ova deulilwa oshilonga osho,” Kalunduka
ta ti.

Okwa yelifa ta ti ka pena oupyakadi itau dulu okukandululwa po, po ka pena oupyakadi hau kalele.

“Oku li kufa omwenyo ka kushi ekandule po lomukundu ndele okueta po omukundu,” Kalunduka ta ti.

fhmalwa@nepc.com.na


2022-10-05  Festus Hamalwa

Share on social media