New Era Newspaper

New Era Epaper
Icon Collap
...
Home / ECN i ikanyuna omapopyo kutya okwa shunitha ko aahogololi

ECN i ikanyuna omapopyo kutya okwa shunitha ko aahogololi

2019-11-29  Nuusita Ashipala

ECN i ikanyuna omapopyo kutya okwa shunitha ko aahogololi

ONGWEDIVA – Aanambelewa yOkakomisi kOmahogololo- Electoral Commission of Namibia(ECN) moshitopolwa shaHangwena nOmusati oya ekelahi omapopyo kutya aahogolololi oya li ya tindilwa uuthemba wawo wokuhogolola aaleli yawo anuwa sho aanambelewa ya li ya ndopa okuthika pomahala gokuhogololela pethimbo. Aahogololi ya li yu uvite nayi posenda yaSakaria Nghikembua momukunda Etakaya moshikandjohogololo Oshikunde noya ti yamwe anuwa oya li ya shuna komagumbo inaaya hogolola konima sho aanambelewa ya li inaaya thika pethimbo ndyoka ya li ya tegelelwa.

Omukuluntu gwomahogololo posenda yaShimanda Nghidimbwandjovo okwa li a itaala kutya oya li ya tokelwa noowili mbali oshoka okwa li aantu oyendji koosenda oonkwawo. 
Ashike okwa ti oya li ya yi kosenda yaSakaria Nghikembua potundi 16h00 nokwa li a lombwele mboka itaaya vulu okutegelela ya ye kosenda kOshikunde.

“Oko nda li natango potundi 18h00 sho aanambelewa ya tameke. Aahogololi oya li ya lombwelwa uupyakadhi mboka onkene inatu ya tidhaatidha,” Nghidimbwandjovo ta ti ngaaka.

Olopota ya faathana oya li wo ya lopotwa kOndjabalala moshikandjohogololo Endola mOhangwena osho wo kOnaholongo moshokandjohogololo shaGongo moshitopolwa shaMusati.
Omukuluntu gwomahogololo pOndjabalala mEndola Nestor Naimbangu okwa ti oya li ye na aantu oyendji pokataasi kawo kahugunina pOshali shaKanalelo manga inaaya ya kOndjabalala. Ta ti sho ethimbo lyokupata lya thiki opwa li natango aantu 200 momukweyo.

Naimbangu ta ti okwa li a talele po Ondjabalala petameko, nopwa li konyala aantu 10. 
“Itatu vulu okuthiga aantu momukweyo, otu na oku ya yakula notwa li tu na okuninga omalongekidho tu ye kOndjabalala manga ethimbo lyokupata inaali adha, ashike okashina oka li ka pu omahooli,” Naimbangu ta ti ngaaka.

KOnaholongo, omukuluntu gwomahogololo Fillemon Iilende okwa li a tindi okutya ko sha. 
“Aantu ayehe oya hogolola, otwa pata kwa toka. Ondi ipyakidhila okupewa iizemo kooyakwetu. Aawo, ombili.” Osho a ti manga inaa dhima ko kongodhi ye.
 


2019-11-29  Nuusita Ashipala

Tags: Oshana
Share on social media