Omupopiliko wopolifi moshitukulwa shaShana Thomas Aiyambo okwa ti ponhele yokulondela outaksi vopokati kOshakati nOutapi opa dundakana neenghono.

Aiyambo okwa tumbula kutya omatulikilo aa okwa pumbwa ekwafo shaashi inaa longwa pamukalo wokukala oihauto efimbo, ya teelela oku londeka ovanhu. 

Eshi osho nee hashi etifa ovashingi veetaksi va kale ve lihanena odoolopa tava londekele keshe pamwe shaashi onghalo yaapa ve na okulondekela itai nuwa meva.

Omatulikilo aa kae na ondjila yokuya mo ile yokudja mo, ovashingi veetaksi ohava longifa ashike ombinga imwe, okuya mo nokudja mo. 

“Paife ihatu kala vali tu shi otuwa ei ya fendelelwa okukala mopate tai tutu ovanhu naayi inai pumbwa okukala tai tutu ovanhu shaashi ovanhu ove li ashike mumwe. Eembudi nado paife omo ashike de lihanena mokati kovanhu omu shaashi kape na eyooloko,” Aiyambo ta tumbula. 

 Ovashingi vee taksi ohava kondjele ovanhu nokuvanyeka oinima yavo. 

Aiyambo okwa tumbula yoo kutya omatulikilo aa kae na outala vomidile okuamena ovakwashiwana pefimbo va teelela oihauto i yade voo va dule okuya molweendo. “Ovashingi novatwaalelwa ohava mono oixuna kodula pokulombo nokomutenya pokwenye. Ovashingi veetaksi ohava kala unene ve na oshimaliwa momitwe, ndele ihava kala va fya oshisho mokuhenuka oiponga. 

Vamwe nokuli oto hange tava shingi ashike va yuka movanhu omo voo tava eta oiponga,” Aiyambo ta weda po.

Aiyambo ota pula ehangano loNamibia Bus and Taxi Association (NBTA) nosho yo ouministeli woilonga noyeendifo opo va ete po elandulafano nomukalo wokuyoolola eetaksi keetuwa dopaumwene. 

“Eshi otashi tu ningile yoo shipu ongopolifi opo tu mone mo eembudi edi hadi faduka po noinima yovanhu. 

“Meedoolopa dikwao eetaksi ohadi kala da natekwa eenomola dakula nawa opo di kale da yooloka keetuwa dopaumwene,” Aiyambo ta fatulula.