Eefikola 26 moshitukulwa shaHangwena, Omusati noshaShana oda lopotwa da pata molwa omeva efundja.

Oshitukulwa shaHangwena omo unene mu na eefikola dihapu da pata dili 17 omanga mOmusati omwa lopotwa nhano nomOshana nhee. 

Eefikola 24 oda pata ashike keendodo dounona veli okudja peendodo yopedu fiyo ondodo onhi-7.

Eefikola 19 domwaado, odo moshitukulwa shaHangwena omanga mOshana mwa patwa eefikola nhano keendodo dopetameko.

Omukulunhuwiliki wehongo moshitukulwa shaHangwena Isak Hamatwi okwa hokolola ta ti elalakano lokupata eefikola opo ku kelelwe ovanafikola vaha ninge oihakanwa yokufila momeva.

Hamatwi okwa yelifa ta ti fiyo opapa ka pena omunafikola a lopotwa a xulifila momeva onghee ombelewa yaye otai kwashipaleke kutya otai ka pata eefikola odo tadi ka kumwa keefundja.

Okwa ti ngeenge omeva efundja okwa pwinine ovanafikola otava twikila neetundi davo ashike ofikola keshe otai ka falula omafiku oo kwa li ya pata.

“Elalakano lokuvalula omafiku ofikola ya pata opo ovanafikola va kale tava longwa oule womafiku oo kwa li ofikola ya pata. Onghee ombelewa yange otai kwashipaleke kutya efimbo olo ovanafikola va kala meumbo ota li kafutilwa po,” Hamatwi ta ti.

Okwa weda po ta ti eefikola ngaashi Udjombala Secondary School nOnanghulo Combined School odi na ovanafikola hava di pofikola hava nangala meendodo odo kwa li dina ovanafikola ovo ve li komaumbo paife.

“Ohatu yandje oikulya keefikola odo dina ovanafikola hava di peefikola ashike otwa lela eshongo loikulya ina i wana shaashi ovanafikola ovahapu,” ta ti.

Hamatwi okwa ti eefikola heyali ota di kala dina ovanafikola hava di meetenda ngeenge da yambididwa noikulya, omatalashe nosho tuu.

Okwa indila omahangano a yooloka, ovanangeshefa novaleli vopapolitika opo va yambidide ovanafikola noikulya noshoyo oikwafifo hai dulu okulongifwa meefikola.

Okwa kumaida ovadali opo va twikile nokutonatela ounona wavo pefimbo ve li komaumbo osheshi omeva eefundja