Elelo lyondoolopa yaNgwediva olya kumagidha aakalimo ya fute iifuta yawo yokomwedhi omanga omasiku 10 Mai nuumvo inaaga thika.

Omupoliko melelo lyondoolopa yaNgwediva Jackson Muma okwa ti, otaya ka tula miilonga omulandu gwokukondolola oondjo okuza momasiku moka, konima ya li ya gandja ompito yaamboka itaaya vulu okufuta omolwomukithi gwoCovid-19.

“Otatu ka tameka okuteta ko kehe shoka shi li moondjo, naamboka inaaya thika poombelewa naya popye omatompelo nomaudhigu gawo nenge shoka tashi ya imbi omanga omasiku ngoka inaaga thika, oshoka okuza mpoka itaya ka silwa ohenda,” ta ti ngaaka.

Muma okwa ti, elelo lyondoolopa okwa li lya tokola okukutha onkatu ndjoka omolwaoondjo tadhi londo dhu uka pombanda, ihe aakalimo itaya futu ko nando okamaliwa hoka ye na po.

Omulandu ngoka ogwa li gwa tulwa miilonga kepangelo omumvo gwa yi, kutya omeya inaga patwa omolwokukaleka po uuyogoki osho wo okukeelela etaandelo lyomukithi gwoCovid-19.

Natango elelo lyondolopa okwa li lya tala omawupyakdhi gamwe, oshoka aaniilonga yamwe okwa li ya kanitha iilonga yawo.

“Otwa ningi ethimbo tatu kambadhala okukumagidha aakalimo ya fute iifuta yawo yokomwedhi, ihe haayehe haye shi gwanitha po nenge ya yamukule opo tu mone kutya oshike shi na okuningwa po,” Muma ta ti ngaaka. 

Ta gwedha po ta ti,  shoka otashi tulwa miilonga okukaleka po oshowo okuhaatula elelo lyondoolopa moondjo. 

Elelo lyondoolopa yaNgwediva otali pandula aakalimo mboka ya kala nokufuta iihohela yawo yokomwedhi nonando ya kala muupyakadhi womukithi gwoCovid-19.

Muma okwa ti aakalimo naya kale ya futa iihohela yawo okuudha.