Lasarus Hakwaake

Eenhana - Ouministeli woukashike kokanhu nonghalonawa younona moshitukulwa Ohangwena owa pewa oshimaliwa shi fike peemiliona N$6.1 kehangano loukumwe waEuropa opo va tunge omandiki oiputudilo younona yopetameko. 

Oiputudilo ei oya tukulwa moitukulwa itatu; moshitukulwa Omundaungilo otamu ka tungwa endiki lakula lokinda olo tali ka ninga yoo onhele yoku deulila ovalongi veekinda domoshitukulwa oshoyo onhele yoku ningila oyoongalele yoshiwana ta li kosho emilliona N$2. Moikandjohoololo ngaashi Eenhana, Epembe nOndobe otamu ka tungwa endiki lopokati lokinda olo keshe limwe ta li pula omiliona imwe N$1.1, nomoshikandjohoololo Ongenga, Omulonga, Engela nOshikunde otamu ka tungwa eekinda dinini koN$200 000, keshe imwe.

Omunambelewa omukulunhu ena sha nomaxumifokosho oshiwana oshoyo eputudo loohembudangele Herman Angula okwa koleka kutya ova mona oshimaliwa okudja kehangano loukumwe waEuropa opo ku kale kwa tungwa omandiki oiputudilo younona yelongo lopetameko. Okwa popya kutya oilonga yoku tunga oya yandjwa nale kovene notava ka tameka meendelelo lakaimbi ta vakula oxuxwa. Herman okwa ti kutya ekwafo eli oleya pefimbo la wapala unene eshi oshitukulwa sha pumbwa eekinda opo ku putudwe ounona ngaashi sha vilikilwa nawa noshi li oshishonekwa shepangelo.