Omupopiliko wouministeli womidingonoko nomatalelipo Romeo Muyunda okwa ti ovambelewa hava longo koshikondo shetonatelo loifitukuti oveli pyakidila nokukonga eendjaba nhee deli teyela kOkakarara mexuliloshivike.
Muyunda okwa ti okwa lopotwa eendjaba da monika modoolopa yaKakarara tadi tava kana efimbo lokomatango dauka momikunda dopomudingonoko waKakarara.
Okwa ti eendjaba edi ina di ningila ovanhu ominyonena ile omaliko ovanhu ashike ovakwashiwana ove na oumbada kutya pamwe otadi va ponokele efimbo lokonguloshi.
Muyunda okwa ti otai indile oshiwana opo shi longele kumwe novambelewa mokuyandja ouyelele kombinga yeendjaba edi kutya oda yuka peni.
“Oshiwana nashi kale shili oupafi efimbo keshe shaashi eendjaba ohadi dulu okudipaa ile okulemaneka ovanhu,” Muyunda ta ti.
Okwa kunghulila yoo opo ovanhu hava ningile eendjaba ominyonena.
Myuyunda ta ti oshiwana na shi kale tashi lopotele ovanambelewa vouministeli ngeenge va mona oifitukuti tai tava kana momidingonoko davo
opo idule okukala ya kwatwa po meendelelo.
Ta okwa weda po ta ti ouministeli womidingonoko otau lalakanene okukala wa kwashipaleka kutya ovanhu oveli meameno la wana loifitukuti.