Eshi kwa didilikwa kutya moshikandjohoololo Eengodi omu na omhumbwe yeendjila, kansela woshikandjohoololo shEengodi Protasius Neshuku okwa ti eefikola dihapu domoshikandjohoololo shaye ohadi fiwa po kovahongifikola molwaashi mEengodi kamu na sha omayakulo a wana.
Okwa ti ovahongifikola ihava kala efimbo lile peefikola shaashi moshikandjohoololo omu na oupyakadi womayakulo eendjila di na omafululu neenghono.
Kansela okwa ti ngeenge ovahongifikola va landa eetuwa davo ihave di shingi shaashi eendjila odi na omafululu neenghono.
Edi Neshuku okwe di popya Omaandaxa eshi va ninga eenghundafana naKundana Etitatu ta hokolola nghene omhumbwe yeendjila i li eshongo linene moshikandjohoololo shaye.
Okwa ti moshikandjohoololo shaye omu na ashike ondjila imwe oyo ya fa i li xwepo hai dulu oku enda eetuwa dishona omanga eendjila dikwao ihadi longifwa eshi di na efululu.
“Ngeenge kape na omayakulo a wana eshi ohashi eta opo ovahongifikola vaye koikandjohoololo oku ku na omayakulo mawa ngaashi omeva a wana neendjila di li nawa,” Neshuku ta ti.
Kansela okwa weda po yoo vali ta ti moshikandjohoololo shaye omu na eshongo linene loupangelo inava wana eshi mu na ashike okapangelo kamwe ke li momukunda Omishu haka longifwa kovanhu aveshe.
“Ovanhu vamwe ohava ende oshinano 50 km tava ka konga ouhaku koupangelo koikandjohoololo ya yooloka shaashi okapangelo ke li moshikandjohoololo shange ohaka la ke hadi efiku keshe,” Neshuku ta ti.
Kansela okwa ti ombelewa yaye oya shivifila ombelewa yangoloneya kombinga yomhumbwe yeendjila noupangelo ashike oupyakadi woshimaliwa inashi wana oo unene tau imbi okuyandjaneka omayakulo koikandjohoololo.
Okwa kunghulila oshiwana opo shi twikile nokukala shi li mekwatafano nombelewa yaye ngeenge pe na eshi sha hala okushivifila kansela.