ONGWEDIVA - Ester Nuusiku (55), oo e li omukalimo womoWindhoek, okwa ti oshitalenti shokulongifa omake aye oshe mu etela oiyemo novaneumbo laye. Nuusiku oku na ongeshefa yokuninga eenghaku doshipa odo ha tungu po ye mwene. Mokuputuka kwaye, Nuusiku okwa kala oye oshiveli shomeumbo naashi a kula oye a kala omutwe wofamili yaye. Onghalo ei oye mu fininika opo a tameke ongeshefa yokuhondja eenghaku doshipa osho sha kala oshitalenti shaye omanga a li munini.
Nonande kasha li shipu okweeta po ongeshefa ei, omukainhu ou okwe shi fulula ko. Ta ti onghalo yongeshefa oya ka xwepopala unene eshi umwe womounona vaye a pita ofikola yopetameko, ndele te ya koshiputudilo shopombada moWindhoek. Pefimbo olo, okamonakadona kaNuusiku aka oka tameka nee okuvatela ina mongeshefa. Mokudimbuluka nghee a tameka ongeshefa yaye omukainhu ou ota hokolola kutya omafimbo amwe ka li e na oikwafifo ya wana okuninga eenghaku. Vali, ka li naanaa e na ovalandi shaashi ongeshefa yaye kaya li i shivike.
Ta ti havanhu lela vahapu ve na eshiivo ngeenge oha landifa eenghaku doludi eli, onghee osha kala shidjuu okushiivifa ongeshefa yaye. “Onda kala handi tumu ounona vange, ve na ondjato yeenghaku va ka landife, tava ende nomaumbo tava konghola pamwe ope na naa ou ta kufa mo,” Nuusiku ta ti. Ashike nande ongaho natango inashi kwafa sha lela shaashi ihamu di sha shiyamba. Nuusiku okwa kala ha nangele omauliko opaipindi aeshe oo haa kala moWindhoek, shaashi oko ha dulu okulandifa omapando mahapu meni lokafimbo kanini.
Johanna Hosea oo eli umwe womovana vaNuusiku okwa popya kutya yee okwa kala ha vatele ina mokushingifa eenghaku momikalo dihapu.
Hosea okwa tameka nokutota omapandja oipindi komalungulula, novanhu vahapu ova kala hava lande okudilila komalungula. “Luhapu ngee nda dimbuka kofikola, ile momaxulilo oshivike, ohandi fi oshisho alushe opo ndi twale eenghaku adishe odo da landwa okudilila komalungula koovene,” Hosea ta ti. Okwa weda po yoo kutya eshi osha ka ninga omukalondjiikilile novanhu vahapu vokeedoolopa da yooloka ova tameka okukala hava lande eenghaku kuye, yee te di tumu keedoolopa da yooloka. Fimbo limwe nokuli oha dulu lela okuya keedoolopa dokokule a ka landife eenghaku.
Hosea okwa tumbula kutya yee ke shi okutonga ongeshefa yaina, shaashi omo va kakala hava xupu. Okwa weda po kutya ofikola yaye aishe omo ya futwa opo a dule okukala e li apa e li nena yoo ongeshefa natango otai twikile okuyambidida ofamili aishe opamwe neendenge daye.
Nuusiku ota kunghulile ovakwashiwana aveshe opamwe novanhu veedula daye, kutya nava fimaneke oitalendi yavo. “Keshe ashike eshi u na ediladilo lokushininga ile wu udite we shi hala shi ninga ashike, shaashi komesho kaku na mwene,” Hosea ta tumbula.
Ota kunghilile yoo ovanangeshfa vakwao va kale nokufimaneka eengeshefa davo, oshoyo ovo hava kufa ombinga mokuyambidida eengeshefa davo.
Ota indile yoo oshiwana shi twikile nokumuyambidida konomola 0814782121.