New Era Newspaper

New Era Epaper
Icon Collap
...
Home / Efimano loikunino younamapya: Va pewa omadeulo kombinga younamapya

Efimano loikunino younamapya: Va pewa omadeulo kombinga younamapya

2022-11-16  Festus Hamalwa

Efimano loikunino younamapya: Va pewa omadeulo kombinga younamapya

Oomeme vomomukunda Oshalumbu moshikandjohoololo shaKongo otava ti kutya ove na ohokwe yokuninga oikunino yavo opo va dule okushakeneka epangelo ondjilakati.

Ovakainhu ava ve li 25 va dja mopoloyeka Namibia Rural Women Assembly okwa li va pewa omadeulo osha li mexuliloshivike komunafaalama Nahas Ndevahoma koshikunino shaye shi li momukunda Oshalumbu moshikandjohoololo shaKongo moshitukulwa shaHangwena.

Konima yomadeulo, ovakainhu ova hokolola kutya navo ova hala okukala tava longo oikulya yavo vene noshoyo okukala tava landifa oikunomwa yavo momudingonoko.

Onghene ova pula ouministeli wounamapya, omeva netululo lomadu opo u va yambidide neembuto, vo va dule okutameka oikunino yavo momaumbo.

Ovanyasha novakulupe ova pewa omadeulo nghee ve na okukuna oimeno ya yooloka noshoyo ehongo kombinga yefimano loikunino younamapya.

Pefimbo ta yandje omadeulo, omunafaalama Ndevahoma okwa ti ota lalakanene okukala a topolafana ounongo waye nokuxwaxwameka oshiwana momikunda opo shi kale shi na ohokwe yokuninga oikunino yavo.

Okwa ti oikunino younamapya oya fimana momikunda shaashi otai kwafele okulwifa ondjala noluhepo eshi oshiwana tashi longo oikulya yavo vene noshoyo okulandifa okunomwa yavo.

Ndevahoma okwa twa ovakwshiwana omukumo opo va ka tameke oikunino yavo momaumbo nokukala tava ku ka konga omakwafo oikwafifo va pumbwa okulongifa moikunino yavo.

Okwa weda po ta ti ota twikile nokuyandja omadeulo osha li kovakwashiwana ve na e halo lokuninga oikunino yavo.

“Oikunino younamapya oya fimana shaashi ohai dulu oku eta po eemhito doilonga noshoyo okuhambula po eliko loshilongo. 

Oshiwana nashi kale tashi longo noudinini moikunino yavo nokukala tashi topolafana omauyelele kombinga yefimano lounamapya,” Ndevahoma ta ti.

A pandula eshi a pewa omadeulo, omukulupe weedula 73 Johanna Nehemia okwa ti okwe li honga shihapu kombinga yoikunino younamapya onghee naye ota ka ninga oshikunino shaye meumbo laye.

“Naame onda hala okukala dina oshikunino shange meumbo opo ndi kale handi landilafa omatana, eenyanga, ombidi nosho tuu oikumwa ya yooloka,” ta hokolola.

Okwa ti elalakano lokulandifa oikunomwa yaye opo a dule okumona oshimaliwa shoyambidida ovatekulu vaye meumbo nokuvalandela oikwafifo yofikola.

Omunyasha weedula 28 Penexupifo Andreas naye okwa ti okwa pandula komadeulo va pewa shaashi paife okwa kwatwa kohokwe yoku ka ninga oshikunino shaye opo a dule okulimone oyuuyemo. fhamalwa@nepc.com.na

 


2022-11-16  Festus Hamalwa

Share on social media