Obrein Simasiku

ONAMBANGO – Aanona yaali oya li ya sile moshiponga shomulilo mOnambango moshitopolwa shaShikoto mEtitatu. Oshiponga shika osha li sha holoka konima ashike yokathimbo sho yina yaanona mbaka a li a zi megumbo a fala ongodhi ye kotyaatyela pomukunda gopuushiinda.
Nakuvala, Aina Erastus okwa ti omulilo ogwa li gwa tukuka sho aanona ya li taya dhana nuupalwa e tagu yaka mondunda
yimwe yomwiidhi.

Okamati kamwe oka li ka hupu, sho ka li ka tanga omagulu gako okuza mondunda, omanga okamatyona komimvo hetatu nokakwawo koomvula mbali ya tondokele mondunda e taya holama kohi yombete. Ashike sho ya yi kohi yombete, omutala gondunda ogwa mbombolokele meni
noya pile mo sigo omeso. Oonakusa oya li ya tongololwa onga Samuel Namwaapo naTuhupitha Sackeus. Kape na shoka sha li
sha hupithwa mo mondunda ndjika, nomwa pila iinima oyihe mwa kwatelwa uuthemba wopashigwana, iikulya, omakumbatha
niikutu.

Erastus ta ti oshiningwanima shika osha holoka ashike mepakumo lyeho. “Onda piti mo ashike ethimbo efupi, nonda dhengelwa kumushiinda kutya ope na oshiningwanima oshiwinayi sha holoka po. Sho nda galuka onda kundwa ashike komitoko nolwithi talu hulu po, onda li
nda haluka okumona kehe shimwe sha ninga omutoko,” osho yina yaanona nguka a ti noluhodhi.
Kansela gwoshikandjohogololo Onyaanya Petrus Kambala okwa li a indile moshigwana shi tondoke onkugo yepongo okukwathela ofamili. “Ndika
ethimbo lyoluhodhi nompumbwe onene, onkene natu imangeni uukuni kumwe e tatu yambidhidheni ofamili ndjika nokashona hoka tu na po,” Kambala ta ti ngaaka.