Osikola Erundu Combined School mOshakati oya li ya tothwa mo moosikola oonkwawo moshitopolwa shaShana sho ya yambidhidhwa nomizalo dhoosikola Omaandaha.
Omizalo ndhoka dha li dha kotha ongushu N$12 500 nodha li dha gandjwa kaanona ya taalela oluhepo oshowo oothigwa.
Aalongwa posikola mpoka ye li 68 yomoongundu dha yooloka, oya li ya yambidhidhwa noondalaha ngaashi oohema noombulukweya oshowo oongaku dhosikola.
Omukuluntusikola pErundu Festus Kandjala okwa ti, aanona mboka ya yambidhidhwa okwa li ya tothwa mo kaalongi yawo, sha ikolela konkalo ye li muyo.
“Otandi pandula sho osikola yetu ya ningi elago okutothwa mo moonkwawo, nonando itashi ti, oyo ayike yi na aanona ya taalela onkalo ndjoka,” ta popi ngaaka. Ta kumagidha ta ti, oshinakugwanithwa shakehe omukuluntu okuyambidhidha aakuluntu mboka itaya vulu okugwanitha po oompumbwe dhaanona yawo, omolwonkalo ye li muyo.
Kandjala okwa ti, shika inashi ya nyanyudha owala, ashike otashi gandja wo natango omukumo kaalongwa.
“Okuza mpano otamu ka gwedha ko kokulesha omambo geni, opo mu gandje omukumo kaayambidhidhi yetweni oshowo kwaamboka ya hala nenge taye ke tu yambidhidha monakuyiwa,” ta kumagidha aalongwa.
Omukalelipo gwehangano Ketameko Fishing Martha Shivute okwa ti oya yambidhidha aanasikola mboka ye li moluhepo oshowo oothigwa oshoka oyendji aakuluntu yawo otaya nyengwa oku ya gwanithila po oompumbwe dhosikola.
“Oshili oshinakugwanithwa she hangano lyetu, okuyambidhidha mboka taya nyengwa oshowo okutsakaneka mboka ye li monkalo tayi nyengana. Okashona oke vule owala,” ta popi ngaaka.
Shivute okwa popi ta ti, aalongwa ngele taya yambidhidhwa nawa, ohaya ilonga nawa kaaye na uupyakadhi nomalimbililo.
“Aanona oya pumbwa okuyambidhidhwa opo ya longekidhe oonkalamwenyo dhawo oombwanawa monakuyiwa,” ta popi ngaaka.
Omulongwa gumwe e li mondondo ontine, gumwe gwomwaamboka ya li ya mono omayambidhidho okwa ti, okwa nyanyukwa oshoka nani ope na ngaa mboka yu uvu omakemo nomagalikano gaakuluntu yawo.
“Ondi uvite ngame omunelago, oshoka omuzalo gwandje gwosikola ogwa kulupa, naakuluntu yandje oya yambidhidhwa okukalandela ndje ondalaha ompe,” ta popi ngaaka.
Ta ti, ota gwedha ko kokulesha omambo ge, onga olupandu lwondalaha a yambidhidhidhwa nayo.