New Era Newspaper

New Era Epaper
Icon Collap
...
Home / Ehenye Primary School lya gandja omapapa kaalongwa

Ehenye Primary School lya gandja omapapa kaalongwa

2018-11-09  Staff Report 2

Ehenye Primary School lya gandja omapapa kaalongwa

Victoria Kaapanda

OSHAKATI-Osikola ya tseyika nawa mOshakati moshitopolwa shaShana yedhina Ehenye Primary School ndjoka yi li mewiliko lyomukuluntusikola Beatha Kalenga, mEtitano lya zi ko oya gandja omapandulo, ano omapapa goonzapo nomakopi kaalongwa mboka ye she enditha nawa muule wiikakosikola iyali ya pita.

Osikola yEhenye ndjoka yi na oomvula 21 nuumvo oya kala nokugandja omapapa kehe omvula, noshikando shika okwa li oshi-15 nuumvo. Aalonga ye vule 200 oya li ya pandulwa noonzapo nomakopi oshowo omagano galwe mosikola ayihe. 
Pascares Ambunda gomondondo yotango oye  omulongwa dhigi moondondo dhopevi okuza 1-3 omanga Hilma Haimbodi a thigi po oondondo dhopombanda 4-7, noku li mondondo ontiheyali. Okwa landulwa kumbushe ye Hilma Daniel ngoka e li mondondo ontihamana ngoka ta hokololwa komukuntusikola kutya omambo iha dhana nago nando nongele a mono B monzapo ye okelago.

Ambunda naHaimbodi oya li ya pewa omagano goondjato dhosikola dha kola lela, omuzalo gwosikla gwa ihwa po oshowo omapapa goonzapo nomakopi, omanga Daniel a li a pandulwa nomagano ngaashi onzapo, embo lyokupukulula nosho tuu. 

Aalongwa ayehe yomoongundu adhihe mboka ye shi enditha nawa miilongwa yawo yi ili noyi ili oya li ya pewa omagano gi ili nogi ili.

Aavali nayo oya li yi ithanwa koshituthi shika, ye ye ya tale nkene aanona yawo taya pewa omapapa, nonande oyendji kaya li ya holoka okuyambidhidha nokupandulila pamwe naalongi nkene aanona ya teya sho ya kunu.
Omukuluntusikola okwa li a pandula aavali mboka y ali ya holoka siku ndyoka ngaashi Laimi Nghihalwa opamwe naMartha Jekonia mboka ya li ya kwathele aalongi okugandja omagano kaalongwa.

“Aakuluntu naya kale haya thiki posikola ngele pe na iituthi yontumba, inaya kala ya tega oku ithanwa kosikola ngele okanona ka yona nenge pwa holoka sha oshiwinayI, aavali naya kale haye ya okunyanyukwa pamwe naalongi oshowo naalongwa” Kalenga ta ti ngaaka”

Ta gwedhapo ta ti aagandji yiilonga nayo naya kale haya gandja okathimbo okashona kaakuluntu yaanona opo ya kale haya thiki poosikola, oshoka ngele omukuluntu ina ethwa kiilonga nena uupyakadhi oshowo iilonga yokanona ke kosikola iteyi tseya.

“Onkalo yaalongwa yalwe oyi li tayi limbililike noonkondo, uunona wumwe itawu silwa ike  nando oshimpwiyu, aakuluntu naya kuthe ko engaku e taya yambidhidha uunona momizalo dhawo wo wu kale wa yela. Aakuluntu naya kwathele wo uunona meilongo lyawo, naya kambadhale ashihe taya vulu okukwathela aanona ” Omukuluntusikola ta ti. 

Kalenga okwa li a pandula aalongwa ayehe mboka ya kala noye li taya ilongo nuudhiginini. Ta ningi eindilo enene netsomukumo kwaamboka inaya mona omapapa molwaashoka inayi ilonga neitulomo, ya kuthe ko oongaku noyi ilonge lela neitulomo ya fe yakwawo mboka yi ilongo nuudhiginini nokumona omapandulo gomapapa gawo.

Nonande uunona wosikola ohawu telekelwa etete posikola, omukuluntusikola okwa li a kumagidha aakuluntu ya kale taya yambidhidha  uunona nokabaki nokashona hoka shampa ngaa ya makela, oshoka uunona wumwe ohawu kala tawu kotha pethimbo lyootundi oshoka owa sa ondjala, naashoka ohashi etitha endopo lyokanona oshoka ihaka uvu mo sha motundi.


2018-11-09  Staff Report 2

Tags: Oshana
Share on social media