Victoria Kaapanda
Ehogololo lyomumbiishofi gwoshikandjo shuuninginino ndyoka lyaningilwe Etiyali mongeleka yaElcin mOngwediva lya huulile muunyengwi. Oshigongingerki shoka shali sha nuninwa oku hogolola aambiishofi yookiikandjo iyali, okwali sha gongalwa kaasitagongalo ya za komagongalo ga yooloka oshowo aawilikingerki. Ka kwali oshipu. Omahogololo ngoka okwali ga ningwa iikando ine, oku mona omumbishofi gwoshikandjongerki shokuuzilo oshowo omuwiliki shikandjongerki gwokuuninginino.
Omuwiliki gwoshigongi ngerki esiku ndyoka oshowo omunashipundi mongerki yaElcin Nicodemus Shimpanda okwali a holola ewuvo nayi omolwa aahogololi taya yonagula oombapila dhoku hogolola opo kaa ku monike omolwa gwa pumbiwa.
“Natu kaleni mombepo yimwe yo hole, ihe haku holola uuwinayi oku pitila moombapila dhoku hogolola. Shika oshi ningilwawina,” ta popi ngaaka. Dhoka okwali edhi popi konima oompapila ntano dhali dha yo nuka, ihe omolwa aahogololi taya ningile owina.
Shimpanda okwali a fatulula kutya opo gumwe asindane oku ninga omuulikwa mbiishofi, okuna okumona omawi geli 51. Okwali pena ombunda tayi teka, oku mona iitsa mbyoka.
Methigathano lyo lweetho lwotango tango okwali mwa kuthwa ombinga kuEliakim Shaanika, Gideon Niitenge, naAlpo Enkono koshikandjo shokuuninginino omanga koshikandjo shokuuzilo kwali kwa kuthwa ombinga kuMartin Ngodji, Mateus Shapaka shaKapolo oshowo natango Alpo Enkono.
“Olwetho lwotango omo moka mwali mwasindana Ngodji koshikandjongerki shokuuzilo onga omumbiishofi, sho ali a mono iitsa 54, omanga molweetho olutiyali koshikandjo shokuuninginino ayehe yali ya ndopa oku gwanitha iitsa 51,” ta fatulula ngaaka.
Shimanda okwali a fatulula a ikwatelela ko katendo kekotampango lyongerki kutya, ngele iitsa 51 inayi gwanithwa opena ompito yoku hogolola omuwiliki shikandjongerki ngoka taka takalelepo oshikandjongerki.
“Mehogololo lyomuwiliki shikandjongerki, opo gumwe asindane ompito ndyoka okuna oku kala ena iitsa 38,“ ta ti ngaaka. Gideon Niitenge okwali a ningi omuulikwa wiliki gwoshikandjongerki shokuuninginino. Omukwatakanithi gwomawuyelele mongerki yaElcin Thomas Uushona, okwafatulula kutya ethigathano lyuumbishofi olya kolota aakiintu omolwa omatompelo gwontumba.
“Aakiintu nayo oya li ya kutha ombinga, ihe oya ende taya gumo oshoka inaya hogololwa. Omuntu ngele ina hogololwa aluhe momathigathano oha gumo, ihe olye ena oku yahogolola ngele nayo yene oyena omananathano gwokwiihogolola yo yene,” ta fatulula ngaaka.
Ta ti, aakiintu inaya indikwa okuninga aambishofi, ihe oya ndopa oku sindana iitsa tayi pulwa, oku tsikila konkatu yalandulako sigo okoshigongingerki shomahogololo gwomumbiishofi. Ngodji okwapingathana omumbishofi Shakutamba V.V.Nambala ngoka a li omumbishofi gwoshikandjongerki ngokuuzilo. Omanga Niitenge a ningi omuwiliki gwoshikandjongerki shokuuninginino hoka kwali kuna omumbiishofi Veikko Munyika.