WINDHOEK-Omuleshi guuhokololo moshilongo gwedhina Esperance Luvindao, pamwe nomwiimbi gwoongalo dh RnB Paul Da Prince oya li ya tula uukuni kumwe opo ya ete po eilongo lyokupopya komeho yomangungo gaantu lyesiku limwe, sha ningwa Olyomakaya ya piti.

Ndika olyo ethimbo lyomuhokololi ngoka Esperance, oye a li mwene gwoshiindingili shika ha eta po opoloyeka ye kehe petameko lyomvula, sha landula ishewe sho a li a pititha oalbuma ye yuuhokololo yotango ethimbo olyo tuu ndika omvula ya za ko yedhina Etha.

Oshiindingili shika shanunimwa okulonga aantu nkene ye na okupopya mewalangandjo okwa li sha ningwa oshikando shotango poBank Windhoek Theatre School, nopwa li pwa holoka aantu ye thike po 30.

Kumboka ya li ya holoka oya ti oshiindingili shika osha li sha dhenga mbanda, noya longwa oshindji ngele tashi ya kombinga yokupopya mewalangandjo, unene kombinga yiinima mbyoka hayi nyanyudha. 

Kakele kwaashoka, oshigongiilonga  osha li ishewe tashi longo aantu nkene ye na okuwilika oopolohalama dhooradiomuzizimbe nookatimukupulwapale, oku eta po uuhokololo osho woo okupopya oshiingilisa, nokwiimba. 
Omuholokipo gumwepo ngoka a li a holoka poshiindingili shika okwa popi ta ti shika osho shimwepo shomiilongomwa shoka tashi tungu, nokwa hala ishewe Esperance atsikile nomailongo gatya ngaaka monakuyiwa.

Gumwepo ngoka a li a holoka ishewe poshiindingili shika okwa ti uunongo mboka wa ilongwa moshiindingili moka iteke wu dhimbwa we, nokuli a ilongekidha oku ka pita uukonaakonopulo, molwa uunongo mboka wa li wa taandelithwa. 
Esperance okwa popi ta ti eilongo ndika itali ka kala lyotango, ashike otali ka tsikila, nokwa ti eilongo ndyoka tali ka landula ko otali ka kala kamana kandongo.