Festus Hamalwa

Mayola wodoolopa yaNdangwa Paavo Amwele okwa ti ekangha lovanailonga vomelelo laNdangwa ola shunifa omayakulo oshiwana pedu eshi paife meembelewa muhe na vali ovanailonga.

Okwa ti oshi li eshongo linene kovakalimo vomOndangwa shaashi paife ihava mono vali omayakulo ngeenge ve uya keembelewa. “Oshiwana oha shi kala shangudumana pondje yombelewa sha hala okukwafelelwa ngaashi okufuta omeva nosho tuu omayakulo a mwepo a yooloka,” Amwele ta ti.

Edi Amwele okwe di popya Etine eshi a ninga eenghundafana naKundana nghee a hokolola nghee ekangha la eta oupyakadi shaashi paife ovanailonga ihava ka longa va li. Ovanailonga vomelelo laNdangwa ova ninga paife omafiku a heyali ve li mekangha tava pula e wedelo leendjambi davo 10% konima eshi vati va ninga efimbo lile ina va wedelwa.

Ovanailonga ohava kala alushe va ngudumana poshivelo shombelewa yavo va teelela e nyamukulo okudilila kouministeli weedoolopa nehambule po lokomikunda ashike fiyo opapa ka pena e nyamukulo la yandjwa.

Amwele okwa lombwela Kundana ta ti ovanailonga tete ova lombwelwa kutya otava wedelwa 3% ashike ove shi anya shaashi ee 3% odi shona. Umwe womunailonga ina hala edina laye li tumbulwe eshi a kwatafana naKundana okwa ti itava di mo mekangha manga ina va pewa e nyamukulo okudilila kombelewa ya minista weedoolopa nehambule po lokominda.   fhmalwa@nepc.com.na