New Era Newspaper

New Era Epaper
Icon Collap
...
Home / Ekeelelo loCovid-19 oshinakuwanifwa shaaveshe

Ekeelelo loCovid-19 oshinakuwanifwa shaaveshe

2020-07-03  Staff Reporter

Ekeelelo loCovid-19 oshinakuwanifwa shaaveshe

Eshi ounona veli meengudu nhatu dopetameko elela tava tameke ofikola mOmaandaxa, ovadali ove li kwete pomitima va tila kutya otashi dulika shi hanyeke ombuto. 
Ovadali vamwe otava ti vo inave lilongekida okutuma ounona vavo kofikola, unene tuu eshi ombuto ya tandavela, ihe li vali moWalvis Bay nomoWindhoek omo amuke ashike paife oya ya noshilongo ashishe. 

Osho tashi likwatifa pomutima osheshi kutya oshidjuu oku tongola ounona va nini noku va keelela oku dana, shaashi oudano ou li oshitukulwa shavo sheputuko. Ovakulunhu tava ti ekeelelo letandavelo lombuto mounona veli Grade 1 fiyo 3 otali limbililike shaashi natango kave udite ko, oku yelakanifa naavo ve li meendodo dakula shaashi vo inava pumbwa efiloshisho lihapu shaashi ove udite ko kutya ongalo oya yuka peni. 
Ashike omukulunhu wehongo mOshitukulwa shaShana Hileni Amukana okwa ti onghendabala yoku lwifa etandavelo loCovid-19 kai fi ashike oshinakuwanifwa shovahongi ashike oshi nakuwanifwa sha keshe umwe mwa kwatelwa ovadali. 

Amukana ta yelifa kutya ouministeli owa tula po nale elandulafano liwa opo ounona va kale veli li kokule. 
Ta ti ouninisteli owe ya po netokolo oku tukula ounona moungudu va nini ngeenge ve li meengulu dofikola.
Ta ti eshi otashi ka ningwa  momikalo nhatu, nofikola keshe otai ka hoolola kutya otai ka longifa po ulipipo. Ta ti omukalo wotete oyoo ofikola tai ka kala i na eetundi dongula, nodomutenya, mukwao oyoo ounona tave ke liyakula okuya kofikola, hano tava i omafiku a yooloka naukwao oyoo woku xupipaleka efimbo loku longa (eepeliode/eelesson) opo ku dulike oku longwa ounona veli moungudu vahapu mefiku limwe. 
Ta  ti, ngeenge ounona tava i poufudo paife otava kala hava kala po veli metonatelo lovahongi ndele itava kala vali hava kala veli kuvo vene ngaashi sha li nale. 

“Katu shi kutya oCovid-19 otai kala fiyo onaini. Ngeenge nee owa ti okaana koye neudo itaka i kofikola, modula tai ya oto ka ningi ngahelipi? Natango oto ka kelele kofikola,” Amukana ta pula.
Ta kumaida ovadali kutya ombuto otai dulu ashike okulwifa ngeenge ovadali navo tava longo noku kumaida ounona nghene ve na oku li fila oshisho noku li amena. 
“Nava longe ounona kutya nave li kosha keenyala, haku li kwata komalutu, nava kale va djala oumask alushe vo nave li kale kokule,” Amukana ta ti. 


2020-07-03  Staff Reporter

Tags: Khomas
Share on social media