New Era Newspaper

New Era Epaper
Icon Collap
...
Home / Ekopi lyoThe Namibian otali ka eta ongeshefa kOshana –Irimari

Ekopi lyoThe Namibian otali ka eta ongeshefa kOshana –Irimari

2020-03-11  Staff Reporter

Ekopi lyoThe Namibian otali ka eta ongeshefa kOshana –Irimari

ONGWEDIVA - Ngoloneya gwoshitopolwa shaShana Elia Erimari okwa ti ethigathano lyEkopi lyoThe Namibian Newspaper Cup otali ka eta omalanditho omawanawa koongeshefa dhomoshitopolwa. 

Irimari ndhika okwe dhi popi pethimbo a li ta gandja uuyelele koshigongalele shiikundaneki sha longekidhwa okugandja nokukundaneka shoka sha longekidhwa po kethigathano lyoThe Namibian Newspaper Cup ndyoka kwa tegelelwa lyi ka kale ko mehuliloshiwike lyapaasa mOshana.

Pethimbo lyoshigongalele, Irimari okwa pula aanangeshefa moshitopolwa opo ya se oshimpwiyu kutya oya pambula ko koshikwiila shongeshefa sho tashi etwa moshitopolwa kethigathano ndika.

Ngoloneya okwa gandja uuyelela kutya oongeshefa odha tameka nale okumona omauvaneko omawanawa tage ya moshitopolwa, nokwa totha mo omahala gokuthuwila ngaashi oohotela nuuBnB moondoolopa ngaashi Oshakati nOngwediva ndhoka dha ningilwa nale oshilage kaatelelipo, nodhindji odha udha nale nokuli iilage mbyoka. Omahala gamwe goludhi nduka mOndangwa nago oga ningilwa nale oshilage.

Ethigathano lyoThe Namibian Newspaper Cup ndyoka tali ka ningwa oshikando oshitiyali mOshana, okwa tokolwa opo lyi ka kale ko okuza momasiku 10 sigo 13 Apiilili nuumvo kokapale koIndependence Stadium mOshakati. Olyi ihula mo mOshana mo2004.

Irimari ta ti oyindji oya pwa okulongekidhwa, nongashiingeyi otaku longwa owala uunima uushuushuka ngaashi ketala lyokutalela, uundjugo nokosekondele yaIipumbu ndjoka oyo tayi ya okulangekwa yamwe yomaayenda yoshituthi.

Ta ti mongashiingeyi, okapale kokatanga kokoompadhi oke li monkalo tayi etitha oonkondo, nokapale ketanga lyomokambamba nako oke li pokupwa. Iilonga mbyoka ayihe oya longwa mewiliko lyOshakati Town Council ndjoka ya futu oshimaliwa shi li lwopo miliona N$1 opo okapale ka tungwe. Elelo lyondoolopa olya longitha owala oshimaliwa nonande okapale sigo opaife oke li miikaha yUuministeli wAagundjuka nomaudhano.

“Natango otaku kwandjangelwa netsokumweuvathano, opo iilonga yekalekepo lyokapale yi ze ko kuuministeli yo yi ye kelelo lyondoolopa. Ashike shoka itashi ti okapale otaka ningi eliko lyelelo –aawe –elelo otali ka kutha ko owala iilonga yesiku kehe, nekalekopo lyokapale,” Irimari ta ti.
Ehangano lyoStandard Bank olya tula poshitaaafula oshimaliwa shomilionaN$1 okukwashilipaleka uudhano mbuka.

Irimary okwa pula opo aanangeshefa nomahangano galwe moshitopolwa ga yambidhidhe mokusa oshimpwiyu kutya ethigathano ndyoka olya ningwa ngaashi naanaa sha tegelelwa. 
Okwa hiya woo oshigwana opo shi ye kuudhano omasiku sho tagi iyadha.
 


2020-03-11  Staff Reporter

Tags: Oshana
Share on social media