New Era Newspaper

New Era Epaper
Icon Collap
...
Home / Ekwato lyoohi tali hupitha aanooli

Ekwato lyoohi tali hupitha aanooli

2023-03-27  Victoria Kaapanda

Ekwato lyoohi tali hupitha aanooli

Aakalimo yomomikunda dha yooloka miitopolwa yokonooli oya ti nonando oyendji kaye na iiyemo iishana otayi ya yambidhidha niiyelelwa oshowo oothilinga.

Salomon Kanyeni ngoka ta landitha oohi pooha dhopate mOngwediva okwa ti oha menekele omulonga ngoka gwa pita kohi yontopa momukunda Akweenyanga ta kwata oohi opo a vule okulanditha, ye a mone oshimaliwa.

“Ohandi kwata oohi dhandje nokandjolo nonando handho naana ondhindji we momeya, ohamu zi ngaa ndhoka tandi mono esiku ndyoka,” ta popi ngaaka.

Okapandi koohi oheka landitha koN$70 sigo oN$100. Kanyeni okwa ti ookastoma nando handho ngaa ondhindji ohapu pitulwa ngaa kwaa mboka ya landa po.

“Oyendji mboka kwali haya kala ya kalela omuti momukunda ngoka guli popepi netale, taya landitha oshowo mboka kwali haya lalele okukwata oohi, oya shuna komagumbo oshoka oohi nandho odha shonopala momeya’’ ta popi ngaaka.  

Maria Nangolo ngoka ha kwata oohi dhe momulonga Epya Eshona kOkatana okwa ti, pethimbo ndika otaya kwata oohi, taya landitha omanga oontalala mo momukokomoko gomumvo sho iishana ya kukuta, opo yaka vule okulanditha ndhoka dha kukuta.

Ta ti, okulandithi oohi otaku ya yambindhindha lela, okugwanitha po oompumbwe dhimwe.

“Ondi na aanona ye li ya heyali megumbo, handi ya landele iikulya oshowo okugwanithapo oompumbwe dhawo adhihe nodho sikola, ihe oshimaliwa ohandi shi kutha moku shingitha oohi dhandje” ta popi ngaaka.

Ta fatulula ta ti, ndjika ompito yiilonga, oshoka okuna shoka ta vulu okueta poshitafula opo aantu yalye. 

“Ohatu kwata oohi dhetu dha gwana opo tu vule okudhi kukutika nongele ethimbo lyadho lya piti, se ta tu landitha ndhoka dha kukuta,” ta fatulula ngaaka.

Nangolo ta ti, pethimbo ndika oohi dhoka dhili momeya inadhi koka nawa, oontangu odho onene nawa. 

Ta popi ta yolo ta ti, ita vulu okupopya kutya oha longo iingapi komwedhi.

“Otandi ti owala, ohandi mono oshimaliwa sha gwana okuyambindhindha aakwanezimo yandje” ta popi ngaaka. 

Kaino Iitembu ngoka naye ha kwata oohi okwa ti, ohaya longitha oondjolo oshowo oonete okukwata oohi, ndhoka haya lala yedhi tula momeya.

Ta ti, ohaya ka tala oondjolo dhawo pethimbo limwe oshoka inaya hala okuvongola omeya, onkene oyena oowili haya yi momeya.

“Ota tu pandula oshoka otuna mpoka tatu hupile, nonando se yamwe inatu mona embo no pena, ota tu pandula natango oshoka katuli momapandaanda ta tu indile nenge ta tu yaka iinima yaantu,” ta popi ngaaka.


2023-03-27  Victoria Kaapanda

Share on social media