Ngaashi naana kwa didilikwa kutya oikondo yayooloka oya dengwa konghalo yombuto yoCovid-19, Ongeleka yaELCIN otai ti kutya epangelo ola pumbwa oku wedela omwaalu wovanhu va pitikwa okukala veli meni longeleka pefimbo lelongelokalunga.

Omukwatakanifi womauyelele wongeleka yaELCIN moNamibia Thomas Uushona okwa lombwela Kundana ta ti eengeleka dihapu ota di xupu noudjuu shaashi iiyemo oya shuna pedu neenghono.

Okwa hokolola ta ti ombuto yoCovid-19 oya kuma ongeleka yaELCIN ngeenge tashi ya piiyemo shaashi eengelaka davo iha di mono vali oshimaliwa shihapu ngaashi sha kala shito.

“Ohatu indile epangelo opo li kale lawedela omwaalu wovanhu va pitikwa okukala meni longeleka shaashi onghalo yoCovdi-19 otai ende ya u ka kouwa paife. Onghee otwa hala omwaalu wovakwaneongalo u kale wa wedelwa fiyo 200 opo eengeleka di kale ta di yakula ovanhu vahapu mOshoondaxa,” Uushona ta ti.

Uushona okwa yelifa ta ti ka shili pauyuuki shaashi okwa didilikwa eenhele domalihafifo hadi kala di hadi ovanhu unene vangudumana, onghee hano okwa holola omaliudo aye ta ti kutya eengeleka nado na di kale dapitikwa opo di kale ta di yakula ovanhu veli 200 pefimbo lomambo.

“Keengeleka okuna omalandufano elixwa po ngeenge otashi ya pomilandu doCovid-19 mokufaafanifa neenhele domalihafifo. Hano ngeenge epangelo ola pitike ovanhu veli 200 va kale tava ongala mongeleka eshi hasho tashi tandavelifa omukifi woCovdi-19 shaashi eengeleka otadi kwashipaleke kutya oda tula po oikwafifo aishe yeli xwa po,” Uushona ta ti.

Okwa kwandjangela nokupopya ta ti kutya eengeleka odo dimwe hadi yandje omayakulo opashiwana a fimana ngaashi omakoleko, omashasho, okuninga omafundula, nokuninga omapako.

“Mopaife ngaha otuna eendjo depangelo doshimaliwa shoifuta yokongulu shaashi vafitahongalo vahapu ovaxulila mounyengwi okufuta oifendela yokongulu molwaashi ova dengwa konghalo yoCovid-19 eshi mwaalu wovakwaneongalo wangambekwa kepangelo. Onghee mopaife eshi osha eta opo ovafitaongalo va kale tava mono iiyemo ili pedu shaashi eengeleka ihadi ningi vali oshimaliwa shihapu,” Uushona ta hokolola.

Uushona okwa weda po ta ti konima eshi omwaalu wangambekwa wovanhu eengeleka oda xulifa po okukala ta diningi oinyangadalwa ngaashi eexungi deengudu domalwiimbo nosho tuu oinyangadalwa yongeleka ikwao yayooloka.

“Ohandi kunghulile ovakwanehongalo opo va twikile nokukala tave liufa komilandu doCovid-19 edi da tulwa po efimbo ngeenge tave u ya komalongelokalunga,” Uushona ta ti. – fhamalwa@nepc.com.na