New Era Newspaper

New Era Epaper
Icon Collap
...
Home / Elcin a kanifa omumbiishofi mupe nomufita mukulu kwa li e li mopendjela

Elcin a kanifa omumbiishofi mupe nomufita mukulu kwa li e li mopendjela

2021-09-21  Festus Hamalwa

Elcin a kanifa omumbiishofi mupe nomufita mukulu kwa li e li mopendjela

Ongeleka yaELCIN oya kanifa oilyongeleki ivali, omumbiishofi mupe Dr Martin Ngodji nomufita mukulu a hangika e li moshipundi shopeendjela Filippus Nafine.

Aveshe ova fya moshivike shimwe, momafiku e lilandula nova kala tava yakula mongeleki yaELCIN koikondo ya yooloka.

Omuyandji womauyelele mongeleki yaElcin Thomas Uushona okwa popya ta ti ongeleki yaElcin oya kumwa kedjepo loilyongeleki yavo ivali omumbiishofi nomufita mukulu.

Omumbiishofi Martin Ngodji okwa fya momafiku 17 Septemba 2021 moshipangelo shopaumwene shaNdangwa.

Okwa dalwa momafiku 15 Kotoba 1960 momukunda Okamanya, moshikandjohoololo shaKongo.

Momudo 1986 Ngodji okwa nangekwa mofikola youfita keongalo Omundaungilo, omo a kala ta yakula okudja omudo 1986 fiyo 1996.

Omudo 1998 fiyo 2003 okwa yakula onga hamushangangeleki woshikandjo shokoushilo, omo kwa li a hoololwa loikando ivali. Okudja momudo 2004 okwa ka ninga omuhongifikola wovafita kofikola Paulinum koWindheok, nokonima okwa ka ninga omukulunhu wofikola yovafita yoPaulinum omo a kala ta wilike ovahongivoufita efimbo lile.

Konima eshi a dja kofikola youfita okwa ka kala ta longo kOniipa onga omufatululi, omushangi wombiibeli kehangano lokushanga eembibeli melaka lOshikwanyama nOshindonga.

Pefimbo Ngodji a kala ta longo onga omushangi weembiibeli okwa ka hololwa opo a ninga omubiisofi wongeleki yaElcin koshikandjo shokoushilo.

Ngodji okwa hoololwa momafiku 17 Aguste neudo, opo a ninge omumbiishofi omo kwa li a teelelwa okunangekwa neudo momafiku 14 Novemba, onghee opa pita ashike omwedi konima eshi Ngodji a hololwa nokuxulifa.  Okwa xulifa mepupi lomido 60, nomalongekido oshivilopako shaNgodji oku li metifa.

Uushona okwa ti Elcin ota lili yoo vali omufita mukulu a kala e li moshipundi shopendjela Filippus Nafine a xulifa momafiku 16 Septemba 2021 moshipangelo shaShakati.

Nafine okwa kala nokuyakula momaongalo ahupu aElcin ngaashi eongalo lOndobe okudja momudo 1992 fiyo 1999.

Momudo 2000 fiyo 2006 okwa kala omufitaongalo kEloolo fiya ta i moshipundi shopendjela momudo 2007.

Nafine okwa dalwa momafiku 08 Decemba 1936 momukunda Ouheke, mEngela nokwaxulifa mepupi lomido di li 85. Ota ka fudikwa mOlomakaya lomafiku 25 omwedi ou noshiviloxupulifo shaye oshi li ko Etitano.

Omuwilikimbiisofi Dr Shekutamba VV Nambala wongeleki yaElcin okwa pitifa omukanda tau yandja omahekeleko kovakwapata vanakufya Dr Martin Ngodji nomufita mukulu Filippus Nafine ponhele yaElcin.

Nambala okwa ti ota halele yo oilyo yaELCIN aveshe nookaume aveshe omahekeleko, neenghono pefimbo e li lidjuu.

fhamalwa@nepc.com.na


2021-09-21  Festus Hamalwa

Share on social media