Ovakalimo vokolukanda Oshikango mUupindi, modoolopa yaShakati ova lulilwa konghalo eshi tava mono oixuna shaashi kaavena sha edu lokutunga omaumbo avo.
Pefimbo Kundana a talela po ovakalimo vokolukanda Oshikango eshi kwa li vamwe vena eebashu davo dayanaunwa po kumuni waShakati Etivali efimbo lomutenya, ova hokolola tava ti kutya otava mono oixuna unene shaashi ova pumbwa edu opo va tunge po omalukalwa avo.
Ova hokolola tava ti kutya muni waShakati okwa dengulula po eebashu dovanhu dili nhee ndele tai noipeleki yovakwashiwana vati ngeenge ove i hala otave i futile ko oshimaliwa N$3600 keshe keumbo.
Ovakwashiwana vamwe ova popya tava ti kutya ova kala po ponhele opo efimbo lile ashike fiyo opapa ina va pewa edu lokutunga kumuni.
Onghee otava indile kelelo lodoolopa yaShakati opo a kale ta yandje omayakulo kovanhu aveshe, nokukala tava longo pauyuuki shaashi vati muni ita longo pauyuuki.
Foibe Haupindi okwa kala molukanda Uupindi oule weedula 15 notahokolola ta ti okwa lulilwa konghalo eshi ehena onhele yedu tai kalele shaashi ponhele apa pena obashu yaye ina pewa po kumuni.
“Ohatu teke omeva kokule, ponhele apa hatu di kapena sha oundjwo ile olusheno. Ounona vetu pefimbo lodula oha kala tava mono oixuna ngeenge tava i ile tava di keefikola shaashi otuli ponhele hai talama omeva unene,” Haupindi ta hokolola.
Meenghundafana a ninga naKundana kombinga yoshikumungu eshi omupopiliko welelo lodoolopa yaShakati Katarina Kamari okwa popya ta ti ombelewa yelelo lodoolopa yaShakati oya didilika ovanhu hava kala tava dengele eebashu davo ina va pewa epitikilo kumuni.
Okwa popya ta ti elelo lodoolopa yaShakati okwa li la yandja eenhele detu kovakalimo vamwe kOnawa, onghee mopaife ovanhu ova kala tava landifa po eenhele davo edi va pewa kumoni, opo va dule va ka dengele eebashu davo kolukanda Uupindi shi eli papitikilo, onghee okwa ti ovanhu vena eebashu davo edi da yanaunwa po kumoni okwa li nale va pewa onhele yedu kOnawa oyo paife va landifa po.
Kamari okwa yelifa ta ti eebashu nhee edi da yanaunwa po kumuni ka kwa li dina epitikilo lokukala ponhele opo, onghee okwa ti muni ota twikile nokukala ta dengulula po eebashu edi ina di pewa epitiko lokukala ponhele.
“Ku keshe ou ta kala ta dengele obashu yaye ponhele ina pewa po kumoni ota ka pewa ehandukilo lo kufuta oshimali shi fike N$3600,” Kamari ta ti.
Okwa kunghulila oshiwana opo shi kale tashi ningi omandilo edu ngeenge sha hala edu lokunga omalukalwa.
Okwa ti oshiwana na shi kale tashi kwatafana nombelewa yelelo lodoolopa yaShakati ngeenge sha hala ouyelele kombinga yedu shaashi muni waShakati okwe lilongekida okukala ta yandje omayakulo koshiwana.
– fhamalwa@nepc.con.na