Victoria Kaapanda

ONAMEGA- “Immanuel Kauluma Elifas okwa li omulumentu gwombili, gweyego hali kala kombanda kehe ethimbo, omulumentu gwokuninga omashendjo, ngoka kwa li  ha hiki oongongi dhe dhanamambati okunyanyudha aantu ayehe, nokwa li ha egamwa kukehe gumwe omolwa ombili nombepo ye ombwanawa kwa li e na nakehe gumwe.” Ndhoka odha popiwa kElenga Enene lyUukwambi Herman Ndilimani Iipumbu, moonkundathana naKundana sho kwa li ta hokolola nkene a tseya Omukwanilwa gwaNdonga okuza momumvo 1960 pethimbo lyuunyasha wawo, aniwa thimbo ndiya haku zalwa okaholo, omanga  ina ninga omuleli nenge omukwanilwa gwaNdonga. 

Elifas ngoka a hulitha momasiku sho ga li 26 gaMaalitsa nuumvo pomimvo 86 konima yuuwehame mOshipangelo shaNandjokwe, okwa li omunashipundi momutumba gwokutotapo ontotwaveta yevi yokomikunda okuza momumvo 1996  omanga ina ninga omunashipundi gwomalelo gopamuthigululwakalo. “Ekwatathano lyetu nomukwaniilwa kwali olya zi nale nale, omanga ina tameka okulela Ondonga mo1975, naashi nda ka tumbulilwa okulela Uukwambi, onda kala ndi li mepukululo nomekumagidho lye, ye okwa kala ekwatho lyandje enene mokulela”. Iipumbu ta ti ngaaka. Iipumbu tapopi ta ti oya kala haya ende pamwe na Elifas, uunene kiigongi, komitumba dhontumba nakehe mpoka kwa li hapu ithanwa  aaleli yopamuthigululwakalo, ihe ina mona nando uuwinayi waElifas.  Ta gwedha po ta ti ota dhimbulukwa mo 1988, sho kwa li osheendo sha za moNamibia sha ya koZambia shoka sha li sha ka kala momutumba gwa ningilwa moshilongo shoka nokwa li aaleli yopamuthigulwakalo  oyendji ya za moNamibia moka kwa li ya kwatelwa mo nomukwanilwa Elifas. 

“KoZambia hoka otwa li nee twa mono ompito yokutsakaneka Omukokolipresidente, oshowo omuPresidente goSwapo  thimbo ndyoka Sam Shafiishuna Nujoma sho a li e tu kumagidha atuhe noku tu kwalishipaleka kutya Swapo kayi shi omutondi gwaaleli yopamuthigululwakalo nande nande , ihe ehangano ndyoka tali kondjitha okumangulula Namibia a ze miikaha yomutondi”. Iipumbu osho a fatulula ngaaka. Ipumbu okwa li a fatulula uuwanawa waningwa komukwanilwa Elifas, ta ti oshilongo sho sha manguluka, omanga oveta yaaleli yopamuthigululwakalo inayi tulwa miilonga, omasiku sho ga li 26 Maalitsa 1993, Elifas okwa li i ithana omalelo gopamuthigululwakalo pamwe, nokwa li a longekidha okambo koompango dhopamuthigululwakalo, moka mwa li mwa nyanyangidhilwa oompango adhihe dhopamuthigululwakalo  dhoshilongo shaNdonga. Ta gwedhapo ta ti mpoka opo nee pwa ka za omalelo gamwe ga ka  nyanyangidha oompango dhiilongo yawo, ashike okambo hoka oka li ka etwapo mewiliko lyomukwaniilwa Elifas. 

Elifas okwa li a ete po oompango ndhoka sho a li a dhimbulula kutya omalelo gokuumbangalantu gamwe ageke, nonande thimbo ndyoka okwa li ge li gaheyali oshoka Ombandja thimbo ndyoka kaya li po, kage na okukala noompango  dha yooloka. A gandja oshiholelwa kutya ngele omatimba taga futwa naga kale ge na oofuto dhimwe  komalelo agehe gokumbangalantu, nena oongombe ngele ohayi pula N$60 kUukwambi oshowo nashikale komalelo agehe. Omukwanilwa okwa li a eta uuwanawa owundji nonande itawu pu kutumbulwa, okwa li a gandja oompango dhopawuyuuki nodhokugamena aaselekadhi  noothigwa konima yomaso gaaholike yawo, oshowo okwaatidha mboka ya simbapala momagumbo gawo ya ka futwe hoka ya yonwa.  Ngashiingeyi ehalo ohali zi kwaangoka a yonwa ngele okwa hala okufutwa ihe hakaakuluntu yanakuyonwa, nena nakuyonwa ngele ina hala okufutwa ita futwa.

Iipumbu ngoka a kala  omupeha gomukwanilwa  Elifas oku za 1993 muunashipundi womalelo agehe gahetatu kuumbangalantu woshilongo, okwa ti  opamwe nomalelo omakwawo oyu uvite lela ya kanitha omuwiliki, omutekuli omwidhidhimiki ngoka iha landula ngoka e mu ningila omuyonena, ngoka iha nyonkola ngele tekukwatha.

Elenga lyUukwambi Herman Ndilimani Iipumbu okwa ti, Omukwanilwa Immanuel Kauluma Elifas omwenyo gwe nagu vululukwe nombili. Omalelo ngoka ge li gahetatu oga li ga ya koshitondoka nokufala uukwawo wanankali pamwe oku ka popitha ezimo lyomukwaniilwa Elifas, oshowo elelo alihe lyoNdonga. Elifas ota ka fumvikwa ngula 13 Apilili momukunda Olukonda.