Onkundana ombwiinayi ya zilila momukunda Ombulu mOndonga otayi ti kutya Elenga enene lyOmbulu tatekulu Kashona kaMalulu okwa hulitha.

Malulu okwa hulitha konima yomasiku omashona sho Elelo lyOndonga natango lya kanitha omukuutumbiki gwelelo Vilho Kamanya ngoka a fumbikwa Olyomakaya ga zi ko.

Otaku hokololwa Malulu a manene oondjenda mOshipangelo shopaumwene shaMedipark mOngwediva, mEtiyali.

Omuyambidhidhi gwomukwaniilwa gwaNdonga kiipambele yomauyelele Ileni Nandjato okwa koleke eso ndika, ihe okwa ti ita vulu okutsikila ko nuuyelele wumwepo. Uuyelele kutya eso lyaMalulu olya etwa koshike inau tseyika natango koshikundaneki shika.

Nonando Kundana a li a ningi oonkambadhala okumona uuyelele wumwe wa gedhwa po kombiga yeso, aapambele oshowo aaniilonga pamwe naye kakwa li taya monika pethimbo ndyoka.

–  vkaapanda@nepc.com.na