ODIBO-Omahangano eeshi eli avali okwa yambidida endiki lopOdibo nodalate yoluumbo, nokwa udaneka yo okutunga onhele yovakainhu veli momateelelo.
Endiki olina ofikola St. Mary, Oshipangelo oshowo ongeleki yaAngelican.
Odalate oshowo ewalanda loomeme ola patululwa komupedu primaminista Netumbo Nandi-Ndaitwa.
Ewalanda olatungwa keemiliyona N$3.1 omanga ehangano oluumbo lodalate lwa fikamenwapo ko N$650 000.
Moshipopiwa shaye Nandi-Ndaitwa okwa okwa pandula unene ehangano loTunacor noEscalate eshi la yambidida endiki lopOdibo olo kwa li lina omhumbwe yoluumbo lodalate.
Nandi-Ndaitwa okwa ti ota kalongela kumwe nomunyekadi mukulu waNamibia Penexupifo Pohamba okukonga omakwafo okuyambidida Odibo.
“Neudo ketameko lodula okwa li nda ninga omutumba pOdibo pofikola St. Mary omo kwa li nda shiiva ovanhu va yooloka mwa kwatelwa omahangano eeshi. Okwa li twa ongele oshimaliwa shifike N$710283.05 shokulongifwa okuyambidida endiki lopOdibo,” Ndaitwah ta ti.
Okwa ti opena ovanhu vahapu kwa li veli komutumba ou kwa li va udaneka okuyandja oshimaliwa shifike N$164300 ashike fiyo opapa ina va yandja.
Okwa denga omufindo ta ti ota indile ku keshe ou kwa li a ninga eudaneko okutya ota yandje oshimaliwa opo a kale a yandja oshimaliwa shaye, opo shi dule okulongifwa eemhumbwe vali dikwao da talelwa kendiki.
“Unene omuhandjo wounona vovamati ouli monghalo ii eshi u na omatungo a kulupa, kamuna sha eembete, omanga omunino wokuendela onyata itau longo nawa shaashi owa fita,” Ndaitwah ta ti.
Okwa ti omahangano opaumwene, ovaleli vopapolitika na va kufe ko oshihopaenenwa opo e u ye okuyambidida endiki lopOdibo shaashi natango ola pumbwa omakwafo ahapu.
Ndaitwa okwa twa ovanafikola omukumo opo veli honge nelitulemo opo va dule okupita noitwa yopombada kexulilo lomudo.
Moshipopiwa shaye ominista youhaku nonghalonawa Dr Kalumbi Shangula okwa ti omashongo a talelwa koupangelo vokomikunda otawu kandulwa po ashike ngeenge ovanhu tava longelekumwe mokushakeneka epangelo ondjilakati.
Shangula okwa ti oomeme veli humbata na va kale tava longifa ewalanda eli nawa opo va kale ke po oundjolowele wokaana inaa kadalwa ile ounona va dalwa nale.
“Ovanailonga vouhaku tava ka longela mewalanda eli na va kale tava yandja ehongo koomeme veli humbata ile va mona ounona kombinga nghee vena okukala tava lihumbata shaashi eshi otashi kelele ounona va fya pefimbo meme tapulumuna,” Shangula ta ti.
Shangula okwa kunghulila oshiwana opo shi twikile nokukala tashi yi ketunhilo lombuto yoCovid-19 shaashi osha fimana ngeenge omunhu a vendwa.
Okwa weda po ta ti ovanhu na va xulife po okukala tava tandaveleka ouyelele woipupulu kombinga yovenda yomukifi woCovid-19.