Ngoloneya gwoshitoplwa shaMusati Erginus Endjala okwa ti onkalo yaakwashigwana yaAngola mboka ya tauka koshilongo shawo omolwondjala, otayi etitha ohenda notayi sho lolitha.

Ta ti, nonando ope na omapopyo okuza koshilongo shawo kutya aantu mboka oyeya moNamibia taya kongo aakwanezimo yawo yeli muka, kashi shi shoshili. “Aantu mbaka oye na ondjala, omalutu gawo oshowo guununa otaga ulike ge na omanyutu omolwondjala,” Ngoloneya ta popi newi lyohenda.

Aangola mboka, oya dhika uutenda wawo kEtunda oshowo kOshifo moRuacana. Ta ti omwaalu gwahugunina sho a li ko, ayehe okwa li ye li 744, ihe kehe mesiku komwaalu ohaku gwedhwa.

Ngoloneya ta ti, ngaashi ethimbo ndika lyomvula, ito hala okutala mukweni e li monkalo ya tya ngaaka, omanga ngoye to li ethimbo alihe.

“Nonando oongamba dhetu odha pata  omolwomukithi gwocorona, aantu mboka ohaya iyakele moNambia,” ta ti ngaaka. Epangelo lyaNamibia okwa li lya ningi onkambadhala okugandja ooshako dhuusila dhi li 2 000 noondoha dhoohi dhili 2000.

“Oshiwike sha zi ko epangelo lyaAngola okwali lya talele po aantu yalyo, ihe olya gandja oondoha dhoohi dhi li 20, nooshako dhuusila dho 10kg dhi li 20,” a popi ngaaka.

Ta popi ta ti, otashi limbilike nduno kutya iikulya mbyoka ya gandjwa otayi gwana ngaa aantu ayehe mboka, na ngele oye na ngaa ohenda naantu yawo.

Ngoloneya okwa indile moshigwana kutya ngele ope na ngoka e na ehalo lyokugandja shoka e na po okukwathela aantu mbaka taya mono iihuna ne shi ninge.

“Aantu yaKalunga otaya mono iihuna, ngele owu na iikutu iikulu nenge iikulya to vulu oku yi gandja, manguluka okuthika paantu aakweni ye na omwenyo,” Ngoloneya ta popi ngaaka.