Festus Hamalwa
Omukundu wenota wa kala momudingonoko waKapya nOshuuga osho wa kandulwa po. Kansela moshikandjohoololo shOndangwa yodoolopa okwa longifilula ominino domeva odo da kala pomudingonoko opo ihadi longifwa.Okwa didilikwa pa kala omunino womeva itau longo okudja omudo wa dja ko, naashi osha kala eshongo linene kovakalimo vopomudingonoko.
Kansela woshikandjohoololo shaNdangwa yokeedolopa Leonard Negonga okwa patulula opomba ei mEtitatu. Opomba ei oili pOkapya. Pefimbo lepatululo, Negonga okwa ti omeva okwa fimana komunhu aveshe nohaa longifwa efimbo keshe, onghee naashi osha eta opo ombelewa yaye i kale ya pula ekwafo loshimaliwa kelelo loshitukulwa shaShana sho kulongifulula omunino oo.
Okwa ti ombelewa yaye otai lalakanene okuyandja omayakulo koshiwana shili momhumbwe komikunda da yooloka. “Mopaife ngaha ovanhu itava ende vali eendjiladile dile tava ka teka omeva keendungu ile momifima shaashi paife opomba oya patuluka,” Negonga ta ti.
Okwa kungulila oshiwana opo shi kale tashi kale ke po opombada ili mefiloshisho alushe, yoo i dule okulongifwa efimbo lile nokepupi tali ya. “Omeva okwa pumbwa okukwatwa nawa, ina ndi hala okulopotelwa nande ovanhu itava longifwa nawa omeva. Ku keshe omunhu ta ka longifa nai omeva ile ka teya po opomba ei na kale a lopotwa kombelewa yange meendelelo opo a kale a ka tukilwa onghatu yopaveta,” Nengonga ta ti.
Okwa pandula elelo lopaukansela moshitukulwa shaShana eshi la yambidida opombelewa yaye noshimaliwa shi fikeN$87 000 shi longifwe omunino wopomba. Maria Engobe omukalimo womukunda Okapya okwa hokolola ta ti ova kala tava mono oixuna konghalo yenota okudja omudo wa djako konima eshi omunino wopomba yavo wa kala ita u longa vali.
“Otwa kala a tu ende endjiladiledile a tu kateka omeva kokule keendungu, efimbo limwe ohatu nangalele ondjala shaashi kapena sha omeva okutelekifa,” Engobe ta hokolola. Okwa ti ova pandula unene kanasle eshi a kandula po omukundu wenota shaashi paife otava kala tava nu omeva ayela. Engobe okwa weda po ta ti natango ovapumbwa omakwafo ngaashi oikulya shaashi vati momapya avo neudo ina mudja sha shipondolifa.