Kansela woshikandjohoololo shaShikuku Matheus Gabriel okwa hokolola ta ti ombelewa yaye oye shi pondola okukandula po omukundu womeva eshi omikunda dihapu di na omeva mayela okunwa paife.
Kansela okwa ti omikunda adishe 48 domoshikandjohoololo shaShikuku odi na eepomba domeva a yela paife eshi ovakwashiwana hava nu keepomba.
Gabriel okwa lombwela Kundana ta ti pefimbo a ninga kansela waShikuku okwa hanga oshiwana tashi mono oixuna eshi ovakalimo vahapu va kala hava ende oshinano shile okukateka omeva kokule.
Okwa hokolola ta ti osha fimana ngeenge oshiwana shi na omeva a yela shaashi eshi otashi kelele ovanhu vaha kwatwe komikifi edi hadi dulu oku etwa kekako.
Onghee okwa ti elalakano lokukandula po omukundu womeva opo ku kefelwe oshiwana shiha kale vali tashi nyenyeta omhumbwe yomeva.
“Ovakulupe momikunda da yooloka ove li va mona ouwa womeva shaashi paife ihava nu vali omeva a dja meendungu omanga oomeme ve na ounona vashona navo ihava ndjeneke vali omeva ngeenge tava pe ounona wavo omeva,” Gabriel ta ti.
Onghee eepomba domeva oda fimana momikunda opo ovakwashiwana va kale itava teke vali meendungu ile momifima.
Kansela okwa ti eepomba dovakwashiwana dimwe oda didilikwa di na omeva taa ende kashona eshi oshiwana hashi kala sha ngudumana peepomba shaashi omunino womeva ohau kala tau ende kashono.
Kansela okwa weda po ta ti ombelewa yaye oye shi pondila yoo vali okukala ya kandula po omukundu womakwatafano omawi momhepo eshi paife omikunda dihapu di na omakwafano e li nawa ngeenge ovanhu tava longifa eengodi dopeke.
Gabriel okwa weda po ta ti nonande moshikandjohoololo mu na omashongo akwao ngaashi eepate dii, oupangelo ve li kokule nosho tuu omashongo amwepo a yooloka a taalelwa kovakalimo ombelewa yaye otai kendabala opo i kale ya kandula po omukundu ou.