Omupresidende mukulu Hifukepunye Pohamba okwa indila oshiwana, omahangano a yooloka, ovanangeshefa nosho tu ovaleli opo va kale tava shakeneke epangelo ondjilakati mokuyambidida oshikondo shehongo.
Pohamba edi okwe di popya pefimbo lelukululo lofikola Oshidute Combined School ya ninga mbushe yaye paife, Etitano moshitukulwa Ohangwena.
Ofikola oya lukululwa paife eshi ya ninga Hifikepunye Pohamba konima eshi elelowiliki lofikola la tokola okulukila omupresidende mukulu.
Pohamba okwa ti ehongo ola fimana kounona Ovanamibia opo va dule okukala va mona ehongo longushu okutameka peendodo dopedu.
“Otwa pumbwa ovanashilonga vomaifano a yooloka moshilongo ngaashi eendokotola, ovahongifikola, ovapangeli va yooloka nosho tuu onghee osha fimana ngeenge a tushe ni hatu yambidida oshikondo shehongo opo ovanafikola va kale ve na oikwafifo neengulu dofikola deli xwa po,” Pohamba ta ti.
Okwa weda po ta ti okwa hala ofikola Hifikepunye Pohamba Combined School opo i kale ya ninga osekundofikola moule weedula dixupi.
“Ngeenge ofikola ei oya ningi osekundofikola onda hala ovanafikola eshi tava di mofikola omu, vo otava i koshipupudilo shoNUST kEenhana opo veke lihongele omaifano a yooloka,” Pohamba ta ti.
“Onda lombwelwa kutya ofikola ei oya pumbwa okungulumambo, nongulu yokulongelwa oinyangadalwa yoshilongwa younongononi onghee ohandi indile moshiwana opo shi uye shiyambidide ofikola ei opo i dule okukala ya tunga eengulu da pumbiwa,” Pohamba ta ti.
Moshipopiwa shaye omupedu prima minista Netumbo Nandi-Ndaitwah ou a hololwa onga a ninge kahewa kofikola, okwa kunghilila ovahongifikola, ovanafikola, ovadali noilyo tonatelo nengelo opo va kale tava longele kumwe nghee ve na okukala tava heta ofikola i kale tai pitifa nawa ounona.
Ndaitwah okwa weda po ta ti ovanafikola nava kale tave li tula mo moinyangadalwa yavo yofikola opo va dule okupita noitwa iwa kexulilo lomudo.
“Ofikola ei oya pumbwa ovahongi va pyakoka tava dulu okuyandja ehongo longushu kovanafikola unene tuu okutameke peendodo dopedu,” Netumbo ta ti.
Minista yehongo lopetameko Anna Nghipondoka okwa ti ouministeli wehongo otau lalakanene opo okaana keshe okaNamibia ka kale ka mona ehongo longushu.
Efiku tuu olo oshiwana sha li koshindingili she lukululo lofikola osha osha hongela oshimaliwa N$48 000, omanga vamwe ova yandja omindjalofikola kovanafikola, oikwafifo yofikola noshoyo oilongifo yokuwapaleka ofikola.
Ofikola Hifikepunye Pohamba oina ovanafikola 401 mwa kwatelwa ounona voshiwana shovayelele.