Hamushanga-ndjai wongudu yoSwapo, Sophia Shaningwa okwa ti epangelo loSwapo ita li lile owishi kelambo, lo vali tali lungu noku li tapula.
Shaningwa edi okwe di popya pefimbo loshiongalele shinini osho shali koKasisosi koRundu exulike loshivike ladja ko. Shaningwa pamwe novaleli vakwao vopapolitika ove li veli pyakidila noku ninga omaxwaxwameko omolwa omahoololo ookansela vomalelo eedoolopa novopaitukula oo taa ka kala ko 25 Novemba neudo

Shaningwa ta ti mepangelo laNamibia olo lili koshi yelelo laSwapo kamu na nande edengelo lodi peisho. 
Shaningwa edi okwe di tumbula moku nyamukula omapopyo mahapu taa dilile keengudu domhilameno odo tadi ti epangelo mepangelo loSwapo otamu dengelwa odi peisho.
Ta ti ngeenge omunhu oku na eenyala dile, oveta otai longo ashike oilonga yayo, ashike osha puka oku tya ehangano alishe nepangelo otali li lungu tali li tapula.

“Ava ovanhu oohandimwe tava di komaumbo avo. Ongudu yoSwapo oi li ashike kolutenda yafa eshina, epangalo nalo ongashikwao, ashike otu na oku longa novanhu voludi olo, ovo ve na olwisho,” Shaningwa ta ti, 
Ta ti oshiwana ina shi pukifwa kovanhu ile keengudu dopapolitika odo da hala oshiwana shi yale ongudu yoSwapo mongaho. 
“Ngeenge ame onga hamushanga-ndjayi wongudu oda kala ndi ma eenyala dile, ame ohandi kuf wa ko ashike koshipundu ndele tapa tulwa imwe oo ta longo nawa,” Shaningwa ta ti. 

Swapo oka tameka okuulwa kutya ongudu yoku lunga litapula konima eshi eeminista mbali da kwatwa po omolwa oulingilingi woludi olo. Oo a li nale ominista yeeshi noikwafuta Bernhardt Esau noshoyo ominista youyuki nale, Sacky Shangala, ova kwatwa po omudo wadja ko, nove li natango modolongo, va anyenwa elifutilo mo.