Nambia Chamber of Commerce and Industry (NCCI) okwa ningi omaindilo komahangano giimaliwa oshowo komahangano haga futwa iihohela yokomwedhi, ga shunithe pevi iihohela yawo omolwomukithi gwoCovid-19 gwa shunitha oongeshefa odhindji monima.
Omukuluntu gokangundu taka ithanwa “okuyambula po nokuyambidhidha oongeshefa” Amalia Schmidt okwa ti, okangundu hoka oka totwa po komupresidente gwoshilongo Hage geingob omumvo gwa yi okuyambindhidha oongeshefa dha dhengwa koCovid-19. “Oombaanga dha yooloka moshilongo odha topolelwa oshimaliwa okukwathela oongeshefa ndhoka dha shuna monima opo dhi yambulwe po, sha ningwa okupitila momikuli tadhi gandjwa,” Schimdt ta fatulula. Ta ti, epangelo olya eta po wo natango omayakulo ga yooloka nkene aanangeshefa taya nyengwa taya vulu okukwathelwa, opo oongeshefa dhawo kaadhi se po thiluthilu.
Ta fatulula kutya, omikuli ndhoka odha nuninwa aanangeshefa aashona noyopokati, ihe kayeshi mboka haya mono oshimaliwa shi vule oomilliona N$10 komumvo.
Schmidt ngoka a li a popi kutya naye omunangeshefa omukulu esiku ndyoka okwa popi kutya, oku shi okufatulula nkene oongeshefa dha dhengwa nodha shunithwa monima koCovid-19. Oombaanga ndhoka dha li dha thiki esiku ndyoka, FNB oshowo Bank Windhoek okwa li dha fatulula kutya uuna gumwe a hala okupewa omukuli, ongeshefa ye nayi kale ya nyolithwa, ha futu iigandjwa yokongulu oshowo ena oakaunta yombaanga.
“Ohatu mono omanyenyeto ogendji okuza kaanengeshefa kutya, otaya longo nuudhigu uuna taya ningi omaindilo gontumba, ihe shika nashi mone ehulilo,” ta ti ngaaka.
Ta gwedha po ta ti, napu ningwe elunduluko lyomeendelelo opo aanangeshefa ya kale haya mono omayakulo gomeendelelo.
Schimidt ta ti, oCovid-19 oya halakanitha kehe shimwe, ihe oya ningi omaindilo komahangano agehe haga kwathele oongeshefa ga shunithe pevi iihohela yawo oshowo mboka ye li momikuli. Nonando aanageshefa okwa li ya gongala mehwata, oyendji yomuyo oya li ye li ompinge nomukuli ngoka tagu gandjwa, taya ti, otaya pewa uupyakadhi tau tentekwa kuukwawo. Omunageshefa gumwe gwomOshakati, Nelson Shikongo okwati, shoka ye ya po nasho itashi pondola sha, ihe otashi gwedha ko kuudhigu ye na nale.
“Ongiini tatu pewa omikuli ngele omikuli odho tu li mudho nale, molwuupyakandhi epangelo lyi wu wete,” ta nyenyeta ngaaka.
Omunageshefa gumwe nantango okwa li a popi ta ti, epangelo otali tameke pombanda, omanga uupyakandi mboka wu na okukandulwa po tango tali wu thigi po.
– vkaapanda@nepc.com.na