Mboka haya landitha omapya koondando inaadhi faathana naandhoka dha tulwa po kelelo lyopamuthigulwakalo, oye shi kutha momitse dhawo.

Ndhoka odha popiwa komupoliko gwelelo lyopamuthigululwakalo gwOndonga Frans Enkali, sho kwa li a fatulula kutya ompango yelelo lyopamuthigulwakalo, otayi ti, epya olyi na ashike N$600.

“Mboka haya landithwa omapya kiimaliwa ya thika N$10 000 nenge ya pita po,  omboka haya kala ya hala omahala unene onkene ohaya itaalithwa ko okulanda omapya kiimaliwa hayo no ya pitilila,”ta fatulula ngaaka.

Ta ti, pampango yelelo oshapuka, aalandithi yomapya ohaya landitha momukalo ngoka kaashi li paveta dhelelo.

“Sho shoka oyendji nando oya futwa iimaliwa mbyoka ihaye yi eta ko kelelo oshoka oye shi shi kutya oshi li ompinge noompango dhelelo,” ta popi ngaaka.

Enkali okwa fatulula kutya ngele shoka osha lopotwa, mwene gomukunda ohapangulwa opo a fatulule kutya osha ende ngiini omuntu ta landa epya kiimaliwa yathika N$10 000 nenge ya pita po, omanga ompango tayi ti omuntu na fute ashike N$600.

“Shoka otashi vulu okutulitha mwene gomukunda muupyakadhi nokupewa egelo nenge a gandwe opo a hulithe po shoka ta ningi,” ta popi ngaaka. 

Tagwedha po ta ti, oshigwana nashi shuwe kutya pa veta evi olye pangelo, sho shoka uuna mwene gwepya ahulitha, edhina ohali lundulilwa ku ngoka athigwa po.  Ta ti, kape na omuntu taka pitikwa okukonda oompango dhelelo dhoka dha tulwa miilonga.

– vkaapanda@nepc.com.na