Victoria Kaapanda

ONGWEDIVA - Iipala ayihe oya taalela kehala tali ithanwa Mayor’s Park  mOngwediva Olyomakaya tayi ya, momasiku 01 February 2020.
Omugundjuka osho wo omukwatelikomeho gwoshituthi Loide Mpinge okwa ti oshituthi shika otashi ka ningwa esiku limwe, nelalakano okupa ompito kehe ngoka a hala okuvululukwa nokwiinyanyudha mehala lya imwenena kaali na omayogelelo.
Oshituthi shika shedhina “The Session” otashi ka tameka potundi 10h00 yongula sigo 12h00 gokongulohi.
Mpinge okwa ti okwa li a dhimbulula kutya oyendji ohaya kala ya hala okuya pomahala gomayimweneno, kaape na omayogelelo ngaashi goondingosho.
Ta ti ndjika ompito ombwaanawa kukehe ngoka ina hala omahala ga yogelela esiku ndyoka.
“Oshituthi shetu otashi ka kala sha yooloka, komawuliko giipindi ngaashi goshito. Esiku ndyoka itatu ka landitha iikolitha ihe otatu ka landitha ashike iikulya  oshowo iikutu yapashinanena,” Mpinge ta popi ngaaka.
Mpinge okwa ti ndjika ompito ombwaanawa kashingithi yiikulya oshowo iikutu yopashinanena, ya ulike uunkulungu wawo, esiku ndyoka.
“Ta gwedha po ta ti otaku kala wo omayinyanyudho ga yooloka, ngoka taga mwenyeke nokuuvitha nawa,” Mpinge ta popi ngaaka.
Mpinge okwa ti elalakano lyokuyapo nomashingithilo gesiku limwe, okuhumitha oshimaliwa mondoolopa yaNgwediva oshowo okupa aashingithi ompito yokuulika iilandithomwa yawo.
Ta ti omayinyanyudho kage shi owala ngele pe na iikolitha ihe ohaga vulu okuningwa pamikalo dha yooloka ngaashi naana shoka tashi ka ningwa esiku ndyoka.
Esiku ndyoka kehe gumwe ota ka futa N$50 okuya meni. Kehe gumwe okuza kiitopolwa ya yooloka okwa tegelelwa a kale a thika okunyanyukilwa pamwe.
Omwaalu gu thike paantu 400 lwaampoka ogwa tegelelwa gu kale gwa thika esiku ndyoka omanga aalandithi nayo otaye ke ya mehwata.
Omayindilo gomahala oga pu nale mOmaandaha, shapo ngoka ta ka silwa ohenda ongele gumwe ngoka a li a ninga eyindilo inaa
thika.