Omunambelewa kombelewa youministeli wounamapya koshikondo shoandjaneka omeva komikunda mOshikoto Stevenson Tuukondjele okwa ti ombelewa yavo oya taalela eshongo linene lomunino wokuyandjaneka omeva watopa, omanga ve na ashike osheendifo shimwe ashike sho hashi longifwa okutwala omeva keefikola domoshitukulwa.

Omeva oku li eshongo linene la taalelwa keefikola dihapu domOshikoto noshoyo oupangelo nomuna eefikola 20 da ninga oivike ivali dihe na omeva.

 Eefikola dili komikunda koikandjohoololo ya yooloka odo unene da dili momhumbwe molwashi omeva ohaa pu po manga okaloli inaka fika keefikola oko.

Oshivike sha dja ko ovahangifola hava longo keefikola da yooloka mOshikoto ova kwatafana naKundana eshi tava nyenyeta va lulilwa konghalo yomhumbwe yomeva pefikola davo.

“Oikandjohoololo ngaashi Okankolo, Eengodi noshoyo Nehale lya Mpingana oyo imwe ya didilikwa ina eefikola dihe na eepomba domeva onghee naashi osha eta opo epangelo li kale ha li tumu ololi i twale omeva keefikola oko,” Tuukondjele ta ti.

Okwa ti omafimbo amwe omeva ohaa pu po diva shaashi ovakwashiwana ovahapu tava longifa omeva.

Okwa hokolola ta ti efiku keshe ombelewa yavo oha ku kala kuna ovakwashiwana tava kwena enota tava pula opo va twalelwe omeva.

“Ngeenge omunino momeva wateka ka tuna eshi hatu ningi po onghee ohatu kala ashike twa telela ehangano loNamwater opo li ka dule po omukundu,” Tukondjele ta ti.

 Okwa weda ta ti opena ashike ololi imwe oyo hai twala omeva keefikola da yooloka moshitukulwa shaShikoto ashike oha shi kwata efimbo lile opo ololi i dule okukala ya mana ko okutwala omeva keefikola a dishe shaashi eefikola odihapu.

Onghee nashi ohashi eta opo ovahongifikola ile ovapangi vaka teke omeva meendungu nomomifima odo dili pomudingonoko opo pena eefikola.

Tuukondjele okwa kunghilila oshiwana opo shi kale tashi longifa nawa omeva noshoyo oku xulifa po okukala tashi teyaula po oilongifo yeepomba neendoloma.

“Ovahongifikola ohava kala tava ende oshinano shile tava ka konga omeva komifima dokokule shaashi eendungu edi dili popepi odina omeva malula,” ta ti.

Omupopiliko wouministeli wounamapya, omeva nomatululo omadu   Jona Musheko okwa ti oministeli oya didilika eshongo lomeva a twalwa keefikola kwa lata shaashi pena ololi imwe.

“Oministeli oye li pyakidila opo i dule okukala ya kandula po omukundu ou diva,” Musheko ta ti.

Pefimbo Kundana kwa li ta kendabala okukwatafana nomupopiliko wehangano lokuyandjaneka omeva loNamwater Johnnes Shigwedha, ongodi yaye ka kwa li tai nyamukulwa.

– fhamalwa@nepc.com.na