New Era Newspaper

New Era Epaper
Icon Collap
...
Home / Etunhilo loCovid-19 otali kwafa 

Etunhilo loCovid-19 otali kwafa 

2021-02-19  Staff Reporter

Etunhilo loCovid-19 otali kwafa 

Festus Hamalwa

Eshi kwa teelelwa omuti wetunhilo u kale wa fika moNamibia omupopiliko moumisteli woundjolowele Ben Nangombe ota ti otashi kwafele ngeenge Ovanamibia aveshe tava pewa etunhilo loCovid-19 opo shi shonopaleke omukifi moshilongo.
Ben Nangombe eshi okwe shi popila kendiki lokuyadja ouyelele kombinga yoCovid-19 oshivike eshi, eshi ta ti kutya otashi kwafele ngeenge ovanhu aveshe otava tunhilwa opo ve liamene kombuto yoCovid-19.

Nangombe okwa ti ovakulupe novanashilonga vouministeli woundjolowele ovo va teelelwa okukala va tunhilwa tete. Okwa hokolola kutya ovanashilonga voministeli youndjolowele ova pumbwa okutunhilwa tete opo va kale va mangululwa diva va ka yandje eyakulo koipangelo ngaashi tashi dulika.

Yee ta yelifa kutya elalakano lokutunhila ovashilonga vomoministeli youndjolowele omolwaashi ovanashilonga ava ova pumbiwa okukala va amenwa ngeenge ve li moipangelo shaashi ohava longo novanaudu va kwatwa kombuto ei, onghee ngeenge ova tunhilwa tete otashi shunifa omhito pedu opo vaha kwatwe kombuto eshi ve li moilonga.

Kepulo kutya omolwashike ovakulupe ve na okukala va tunilwa navo tete Nangobe okwa ti, ovakwaita volutu lovakulupe kave na eenghono, onghee ovakulupe navo ova teelelwa okukala va tunhilwa tete opo va kale va amenwa diva.
“Ngeenge omwaalu wovanhu muhapu owa tunilwa eshi otashi kwafele okukeelela ovanhu vahapu opo vaha kwatwe koCovid-19, onghee oshiwana osha pumbwa okutunhilwa,” Nangombe ta ti. Nangombe okwa ti ovanhu ava ve li kepango lomikifi dikwao da wedwa po navo otava ka tunhilwa shaashi navo ove li meshongo lakula lokukwatwa kombuto.

Okwa twa ovanashilonga vouministeli woundjolowele opo va twikile nokulonga noudiinini noku kala ve liamena komukifi.
Okwa kunghulila Ovanamibia opo va twikile nokuliufa komalombwelo nokeemhango doCovid-19.


2021-02-19  Staff Reporter

Share on social media