“Ihandi kala nda manguluka ngeenge ndi li mokati kovanhu. Ounona vashona ohava kala va tila nge tava ti kutya ame onda fa ondjaba moshipala. Kashi shi oshinima shipu okukala u na oulema, ou na okukala wa pita momashongo ahapu”.
Felisiana Eusebiu weedula 19 ta hokolola onghalo omo e lihanga omolwoulema oo wa lundulula oshipala shaye.
Eusebiu omunafikola kosekundofikola yaTsumeb e li mondodo 10 nokwa ti okwa hala okuninga ondokotola.
Felisiana oo paife a ninga okakadona ka kula, ota dimbulukiwa nawa eshi a li ha holoka moikundaneki omolwomukifi woshipa hau ifanwa ‘noma’ oo hau li ombelela nokufiya omunhu ta ningi ombululu moshipala. Omukifi oo wa li wa nyonauna oshipala shokaana aka neenghono omido 16 da dja ko. Efimbo olo okwa li okaana lela navahapu, unene ehangano loNamwater ola li la yambidida opo a mone etando nokuwapeka oshipala shaye.
“Onda lemana efimbo kwa li ndi na eemwedi mbali, onda tameka tete ndi na ombulwa yakula moshipala. Nokonima ombulwa oya tosholwa kumeme, okudja opo omwa dja omeva, nokuninga oshipute. Oshipute osho osha enda tashi ningi shakula fiyo nee nda lemana moshipala ngaashi naanaa ndi li ngaha moshipala paife,”Eusebiu ta ti.
Eusebiu okwa ti ota pandula Kalunga shaashi oku na omwenyo noukolele kolutu nonande e na oulema.
Okwa hokolola ta ti yee oha piti nawa moilongwa yaye yofikola, unene tuu omwaalu, oshilongwa eshi e hole nayi.
“Ohandi mono oshimaliwa tashi di kepangelo keshe komwedi, osho handi longifa okufuta ofikola yange nokulanda yoo noipumbiwa imwepo. Ame ovakulunhu vange ihava longo aveshe onghee ohandi xupu ashike mokamaliwa kange oko,” Eusebiu ta ti.
Okwa ti oku na oudjuu wokufuda unene tuu ngeenge e li mokati kovanhu ile monduda kai na omhepo ya wana.
“Okukala u na oulema kasha shi omupya tuu nande, oulema oilonga yaKalunga. Onghee Kalunga okwa shita ovanhu va yooloka vamwe ova dalwa nomaulema omanga vamwe ova lemana mefimbo loukulunhu,” Eusebiu ta ti.
Oulema wange itau imbi nge okulihonga tuu nande shaashi ame ondi na omukumo neitavelo kutya efiku limwe lomomafiku ohandi ka ninga ondokotola yokutanda ovanhu. Okwa twa aveshe ava ve na oulema opo va kale ve shi tambula ko kutya heeno osha longwa sha pwa, yee ta weda po ta ti ovanhu ve na oulema navo ovanhu a shike onghee ova pumbwa okufimanekwa.
“Kalunga iha kwatelwa ngee ta tenge, oushitwe waKalunga ihau yoolwa tuu nande,” Eusebiu ta xulifa nomatumbulo oo.