Ngoloneya woshitukulwa shaHangwena Walde Ndevashiya okwa patululwa pambelewa oilonga yokuwapaleka okapale keedila kaEenhana oshivike eshi.
Okapale aka oka ninga fimbo lile ina ka longifwa noka kala ke li koshi yoixwa nomwiidi.
Moilonga yokapale omwa kutwa ovanyasha 25 va dja moshitukulwa shaHangwena kendiki loNational Youth Service.
Ouministeli woyeendifo neendjila owa yandje oshimaliwa shoN$3507808 kehangano hali deula ovanyasha loNYS opo shi longifwe okulonga oupale vatatu, va kwatela mo kaEenhana, Tsumkwe nokapale Impalila Island.
Pefimbo ta patulula oilonga ei Ndevashiya okwa ti ombelewa yaye oya kala ya didilika okapale kaEenhana ke na oixwa ihapu tai dulu oku heta oshiponga ngeenge neno eedila tadi wile mokapale.
Okwa ti elalakano lokuwapaleka okapale olo oku kala nokapale ke li pamufika muwa taka dule okuyandja omayakulo koshiwana.
“Ngeenge okapale okayela nawa eshi otashi u like efano liwa kovatelelipo nokoshiwana moshitukulwa shetu,” Ndevashiya ta ti.
Okwa weda po ta ti okwa pandula ouministeli weendjila eshi wa yandja oshimaliwa koNYS shi longifwe okuyandja eemhito doilonga kovanyasha tava ka longa moupale vatatu.
Omunambelewawiliki wehangano loNYC George Likukela okwa ti elalakano lokukuta ovanyasha okudja komandiki oNYS olo okukandula po omukundu wokuhe na oilonga.
Likukela okwa ti omunyasha keshe ota ka pewa ondjabi yoshimaliwa N$3700 kexulilo lomwedi ou ngeenge va mane okulonga okapale kaEenhana.
“Okapale keshe ota ka longwa ashike oule womwedi umwe nokonima ngeenge okapu ohatu kaya vali koupale vakwao novanyasha vamwe velili opo tu dule okuyandja omhito kovanyasha vetu aveshe,” Likukela ta ti.
Okwa weda po ta ti ehangano loNYS olina ovanyasha ve li longekida okulonga efimbo keshe onghee okwa ti kukeshe omunangeshefa ile omahangano va pumbwa ovanyasha vokulonga ova manguluka opo va kale va kwatafana nombelewa yavo.