Ombaanga yoFNB oya yandja omakwafo eendoloma dokutula oimbodi dili 15 kelelo lodoolopa yaEenhana Etitatu.
Eshi ombaanga oyeshi ninga nelalakano lokukwashipaleka kutya meni lodoolopa omuna eendoloma da wana oku tula oimbodi opo oshiwana shi kale ke po odoolopa yaEenhana ina oukoshoki. Eendoloma edi da yandjwa odili pongushu yoN$2600 000, nota di ka andjanekwa peenhele dayooloka modoolopa opo ovanhu va kale tava e kele mo oimbodi.
Moshipopiwa shaye mayola wodoolopa yaEenhana Orim-Onn Kavandje okwa tambula ko omakwafo eendoloma nolupandu linene eshi ombaanga yoFNB tai twikile nokukale po oukoshoki modoolopa yaEenhana.
“Eendoloma edi ode ya pefimbo liwa shaashi otwa kala twa didilika ovakalimo tava ku pula oimbodi keshe pamwe modoolopa yetu, onghee mopaife otwa mona oikwafifo omo a tu kala a tu tula oimbodi opo ikale tai ka kupulwashi konhele ye li kalekelwa yo ku kupula oimbodi. Onghee mopaife ngaha otwa teelela opo odoolopa yetu ikale dingi moukoshoki shaashi ovakalimo itava ka kupula vali oimbodi keshe pamwe,” Kavandje ta ti.
Kavandje okwa ti omahangano novanangeshefa nava kale taa kufa oshihopaenenwa kombaanga yoFNB eshi tai longo oshilonga sha fimana nokukala tai xwaxwameke oukoshoki meedoolopa dokonooli.
Okwa ti ngeenge odoolopa oyayela nawa nena eshi ohashi nane ovanhu ile ovanangeshefa opo ve u ye va ninge omangeshefelo avo modoolopa, mopaife ovakalimo na va kale vakwashipaleka kutya otava kale ke odoolopa yayela nawa opo ikale ili mefano liwa.
Moshipopiwa shaye omukulunhu wombaanga yoFNB moshitukulwa shaHangwena Toini Uugulu okwa ti ombaanga yoFNB otai lalakanene oukoshoki modoolopa yaEenhana, nokukale ka omundingonoko wa yela. Uugulu okwa ti odoolopa yaEenhana oyo imwe ya didilikwa hai kala iyadi ovanhu onghee okwa ti osha fimana ngeenge muna oukoshoki modoolopa opo ikale tai nane ovanhu ve u ye oku ninga oipindi nokuyandja omayakulo opashiwana.
Okwa ti ngeenge odoolopa oyayela nawa nena eshi ota shi u like efano liwa kovatalelipo nokounona ve pupi lokomongula.